Májilis depýtaty Ulytaýdaǵy joldardyń sapasyn tekserdi
ASTANA. KAZINFORM — Májilis depýtaty, «AMANAT» partııasy fraktsııasynyń múshesi Erbolat Satybaldın «Jezqazǵan — Qyzylorda» tas jolynyń jaǵdaıymen tanysty. Bul týraly Májilistiń baspasóz qyzmeti málim etti.
Aımaqta «Qyzylorda — Jezqazǵan» avtojolynyń 200 shaqyrymnan astam bóligi rekonstrýktsııadan ótýde. Jumys barlyq ýchaskede júrip jatyr. Keıbir ýchaskelerde ýaqytsha aınalma joldar arqyly qozǵalys ashyldy, jańa joldyń alǵashqy shaqyrymdary tóselip jatyr, sý ótkizgish qubyrlar men kópir tirekteri ornatylmaq. Shymtezek, bıtým jáne basqa da qurylys materıaldary Qazaqstandaǵy karerler men zaýyttardan jetkiziledi.
Májilis depýtaty, «AMANAT» partııasy fraktsııasynyń múshesi Erbolat Satybaldın jóndelip jatqan joldardyń sapasy máselesin jeke baqylaýyna alyp, merdigerlerge jumys qarqynyn jedeldetý qajettigin aıtty.
Májilis depýtaty turǵyndarmen kezdesýde zańnamalyq deńgeıde atqarylyp jatqan jumystar týraly da aıtyp berdi. Qazirgi tańda mańyzdy zań jobasy qarastyrylýda. Depýtattar aqyly joldardan túsken qarajatty tek sol joldardy jóndeýge ǵana emes, halyqaralyq jáne respýblıkalyq mańyzy bar tegin trassalardyń jaı-kúıin jaqsartýǵa da baǵyttaýdy usynady.
— Eger buryn aqyly joldardan túsken qarajat tek sol joldardyń jóndeý jumystaryna ǵana jumsalsa, endi ol búkil ınfraqurylymnyń damýyna paıdalanylady. Sonymen qatar avtokólik ıesi aqyly jolǵa bereshegi bolsa, kólikti sata almaıdy nemese qaıta tirkeı almaıdy. Júrgizýshiler men tasymaldaýshylardyń birinshi sanattaǵy aqyly joldar sapasyna qatysty shaǵymdaryn tyńdasańyz, zań jobasynyń mańyzy aıqyn kórinedi. Júrgizýshiler aqyly joldy ýaqytyly tólese de, jol sapasynyń tómendigi saldarynan kólikti jóndeýge qosymsha shyǵyndanýǵa májbúr bolady. Eger bul qarajat tegin joldarǵa baǵyttalsa, sapa standartyn arttyrýǵa jáne halyqtyń jol sapasyna degen senimin nyǵaıtýǵa múmkindik beredi, — dedi Erbolat Satybaldın.
Jalpy, ótken jyly óńirde 162 km jol salynyp, jóndeýden ótken. Osy jyldyń sońyna deıin «Qyzylorda — Jezqazǵan» trassasynyń 100 shaqyrymyn rekonstrýktsııalaý, «Ulytaý — Arqalyq» avtojolyn ortasha jóndeý jáne 148 shaqyrym jergilikti joldardy qalpyna keltirý josparlanyp otyr.
Buǵan deıin habarlanǵandaı, Ulytaý oblysynyń ákimi Jezqazǵan qalasyndaǵy aýlalardaǵy oıyn alańdarynyń jaı-kúıin tekserdi.