Májilis depýtaty mektepke jumysqa turý úshin syıaqy berý máselesin kóterdi

ASTANA. KAZINFORM — Májilis depýtaty Temir Qyryqbaev elimizde bilim berý sapasyn arttyrýǵa baǵyttalǵan aýqymdy reformalar júzege asyrylǵanymen, mektep júıesinde birqatar sheshimin tappaǵan máseleniń baryn aıtty.

— Sybaılas jemqorlyqqa qarsy is-qımyl agenttiginiń málimeti boıynsha 2023 jyldyń basynan beri bilim berý salasynda 303 qylmystyq is tirkelip, jalpy shyǵyn 17,5 mlrd teńgeni quraǵan. Kóp qarjy jymqyrý faktisi Jetisý, Túrkistan, Qyzylorda, Almaty oblysynda jáne Almaty qalasynda anyqtaldy. Bul aımaqtarda qarjylyq baqylaýdyń álsizdigi baıqalady, — dedi Temir Qyryqbaev Premer-Mınıstrdiń orynbasary Ermek Kósherbaevtyń atyna depýtattyq saýal joldaı otyryp.

Halyq qalaýlysy keltirgen derekke súıensek, bilim salasynda qarjy jymqyrý faktisi boıynsha 249 adam jaýapkershilikke tartylǵan. Olardyń arasynda 10 bilim bóliminiń basshysy, 2 kolledj dırektory, 28 mektep dırektory, 21 balabaqsha basshysy jáne 136 esepshi bar.

— Pedagogıkalyq kadrdy irikteýdiń jańa erejesi engizilgenine qaramastan, burynǵy zańsyzdyqtardy aınalyp ótý jáne jemqorlyq táýekelin týdyrý múmkindigi saqtalýda. Halyq arasynda mektepke jumysqa ornalasý úshin dırektorǵa nemese basqarma qyzmetkerine «zańsyz syıaqy» berý qajet degen qaýeset jeldeı esip júr. Óıtkeni, ońtústik óńirde jumyssyzdyq statıstıkada kórsetilgennen álde qaıda joǵary. Aýyldyq jerlerde mektep, balabaqsha, klýb úıinen basqa jumys kózi tapshy. Sondyqtan muǵalim bolýǵa talpynatyndar tym kóp. Tipti, borant nemese tehnıkalyq qyzmetker bolý úshin de zańsyz aqsha berý jaǵdaılary kezdesedi. Sonymen qatar, qyzmetkerlerdiń jumystan shyqpaý úshin jalaqysynyń bir bóligin berý faktileri týraly da aıtylýda, — deıdi ol.

Osy oraıda Májilis depýtaty Úkimetke kelesi sharalardy qabyldaýdy usyndy: 

1) «Elektrondyq mektep» syndy elektrondyq júıelerdi engizip, bilim berý salasyndaǵy kadrlardy basqarýdyń biryńǵaı elektrondyq bazasyn qurýdy tezdetý;
2) Jumysqa ornalasý protsesiniń ashyqtyǵyn qamtamasyz etip, pedagogıkalyq kadrlardy irikteýdiń ashyq jáne ádil júıesin qamtamasyz etý;
3) Qoǵamdyq baqylaýdy kúsheıtý mańyzdy. Ata-analar komıteti jáne basqa qoǵamdyq uıymdardyń bilim berý protsesine jáne qarjylyq qyzmetke qatysýyn keńeıtý.

Eske sala ketsek, Antıkordyń málimeti boıynsha ótken jyly bilim salasynda jemqorlyqqa qatysty 302 qylmystyq is tirkeldi.