Májilis bıýdjetti naqtylaýǵa arnalǵan zańdy qabyldady

ASTANA. KAZINFORM – Búgin Májilistiń jalpy otyrysynda «2024 – 2026 jyldarǵa arnalǵan respýblıkalyq bıýdjet týraly» Zańyna ózgerister men tolyqtyrýlar engizý týraly» Zańy qabyldandy.

«2024 jylǵa arnalǵan respýblıkalyq bıýdjetti naqtylaý týraly zań jobasy, bıýdjettiń kelesi parametrlerine baılanysty ázirlendi. Birinshi, respýblıkalyq bıýdjettiń kiristeri (transfertterdi eseptemegende) salyq túsimderin 3,1 trln teńgege azaıtýǵa jáne salyqtyq emes túsimderdi 1,1 trln teńgege ulǵaıtýǵa baılanysty 2 trln teńgege azaıdy. Ekinshi, ekonomıkanyń ósý qarqynyn tómendetý táýekelderi jaǵdaıynda óńirlik ósý deńgeıin ustap turý úshin, sondaı-aq bıyl respýblıkalyq bıýdjettiń shuǵyl shyǵystaryn qarjylandyrýdy qamtamasyz etý úshin, Ulttyq qordan beriletin nysanaly transfert 2 trln teńgege ulǵaıtyldy», - dedi Qarjy mınıstri Mádı Tákıev Májilistiń jalpy otyrysynda.

Sondaı-aq, mınıstr depýtattardyń usynystaryn eskere otyryp, Úkimettik borysh qyzmetine 150 mlrd teńge somasyndaǵy qarajatty qaıta bólý qarastyrylǵanyn aıtty.

«Bıýdjet tapshylyǵynda 136,1 mlrd teńge somasyna 2023 jyldyń sońyna bıýdjet qarajatynyń qaldyqtary jáne jekelegen jobalardy iske asyrýǵa qaryzdardy tartý eskerildi. 2024 jylǵa arnalǵan túsimder 20,4 trln teńge deńgeıinde boljanýda. 2024 jylǵy kirister transfertterdi esepke almaǵanda 14,1 trln teńgeni quraıdy. Bıyl bıýdjet tapshylyǵy 3,7 trln teńge nemese jalpy ishki ónimge (JІÓ) 2,7% deńgeıinde boljanýda. Bıýdjet shyǵystary 24,1 trln teńgeni quraıdy. Bul kórsetkishter kepildik berilgen transfert, shyǵystardyń ósý qarqyny men bıýdjet tapshylyǵy boıynsha bıýdjettik qaǵıdalarǵa sáıkes keledi», - deıdi ol.

Buǵan deıin bıylǵy respýblıkalyq bıýdjettiń túsimi men kiristerdiń boljamdy somasy belgili boldy.