Májiliste Respýblıkalyq termınologııa komıssııasynyń mártebesin qaıta qaraý usynyldy
«Prezıdent alǵa qoıǵan osy mańyzdy mindetti oryndaý maqsatynda, eń aldymen, qazaq tilindegi termınderdi qalyptastyrý protsesin jetildirý jáne olardy birizdendirý qajet. Bul rette ótken jyly Parlament Májilisinde «Rýhanı jańǵyrý» baǵdarlamasyn júzege asyrý aıasynda termınologııanyń ózekti máselelerin talqylaýǵa arnalǵan ǵylymı-praktıkalyq konferentsııa ótkizilip, onyń qorytyndysy boıynsha Úkimetke tıisti usynymdar joldanǵan bolatyn. Alaıda, qazirgi qazaq tili termınologııasy salasyndaǵy kózge uryp turǵan kemshilikter áli de tolyq túzetilmeı, qoǵam tarapynan oryndy synǵa ushyrap júr. Úkimet janyndaǵy Respýblıkalyq termınologııa komıssııasy bekitken termınderdiń ishinde kóńilge qonbaıtyn aýdarmalar az emes. Máselen, orys tilindegi «gostınıtsa» termıniniń qazaq tilinde úsh túrli ataýy bar: «meımanhana», «qonaqúı», «qonaq úıi»», - dedi depýtat Káribaı Musyrman Úkimet basshysynyń orynbasary Eraly Toǵjanovtyń atyna joldaǵan depýtattyq saýalynda.
Onyń paıymynsha, osyndaı olqylyqtyń oryn alýynyń úsh sebebi bar.
Birinshiden, Respýblıkalyq termınologııa komıssııasynyń quramyna til máselelerimen aınalysatyn memlekettik qyzmetshiler, fılologtar, aýdarmashylar, jýrnalıst-jazýshylar engizilgen. Olardyń arasynda medıtsınadan basqa, áleýmettik jáne ekonomıkalyq salalardyń mamandary joq.
«Ekinshiden, osy komıssııanyń jumysyna ashyqtyq jetispeıdi. Úshinshiden, onyń qabyldaǵan termınderi usynymdyqqa sıpatqa ıe, ıaǵnı olardy qoldaný mindetti emes», - dedi depýtat.
Osy oraıda ol depýtattyq saýal aıasynda tıisti usynystardy engizdi.
«Respýblıkalyq termınologııa komıssııasynyń mártebesin qaıta qaraý jáne ol bekitken termınderdiń memlekettik organdarda, menshik túrine qaramastan, kásiporyndar men uıymdardyń barlyǵynda, qoǵamdyq birlestikterde is qaǵazdaryn júrgizýde, bilim berý uıymdarynyń oqý baǵdarlamalarynda, kórneki jarnamada burmalanbaı, birizdi qoldanylýyn qamtamasyz etýge baǵyttalǵan normatıvtik-quqyqtyq aktilerdi qabyldaý qajet. Atalǵan komıssııanyń quramyn áleýmettik jáne ekonomıkalyq salalardyń tájirıbeli mamandarymen, belgili sarapshy-ǵalymdarmen, úkimettik emes uıymdardyń ári zııaly qaýymnyń ókilderimen tolyqtyrǵan jón», - dedi K. Musyrman.
Onyń aıtýynsha, Respýblıkalyq termınologııa komıssııasynda qaralatyn termınderdiń jobalary osy komıssııanyń resmı saıtynda ǵana emes, qazaqtildi respýblıkalyq gazetter men áleýmettik jelilerde aldyn ala jarııalanyp, keń qoǵamdyq talqylaýdan ótkizilgeni jón.
