Májiliste Qazaqstannyń sý qaýipsizdigi máselesi kóterildi
«Qazaqstannyń sý qaýipsizdigi memlekettik deńgeıdegi úlken másele. Reseımen aradaǵy transshekaralyq ózenderden bólek, Qytaı jáne Qyrǵyzstanmen aradaǵy sý máselesi taǵy bar. Bul tarapta da sý daýy aýyq-aýyq kóterilip turady. Reseı Federatsııasy Orynbor qalasyn sýmen qamtamasyz etýdi jaqsartý maqsatynda Jaıyq sý bógetin salýdy josparlap otyr. Bóget qurylysyna 300 mıllıon rýbl jumsaý kózdelgen. Eýropanyń uzyndyǵy jaǵynan úshinshi ózeni bolyp sanalatyn Jaıyqtyń sýy jyl ótken saıyn azaıyp barady. 2010 jyldan beri ózen 2,5 metrge tómendegen. Qazirdiń ózinde Jaıyqtyń boıynda 12 sý bógeti bar. Qazir jumys istep turǵan 12 bógettiń árqaısysynyń kólemi 10 mln sharshy metrdi quraıdy. Bul aldaǵy ýaqytta ekologııalyq qıyndyqtarmen qosa, Qazaqstannyń sý qaýipsizdigine de úlken soqqy bolýy múmkin», - dedi depýtat.
Osy oraıda ol bıyl Reseıden sý satyp alýǵa qatysty málimdeme jasalǵanyn aıtty. Onda Batys Qazaqstan oblysyna Reseıden 131 mln tekshe metr sý satyp alýǵa baılanysty 3,5 mlrd teńge qarjy bólý máselesi 2021 jylǵa arnalǵan bıýdjettiń múmkindigine qaraı qarastyrylatyny aıtylǵan.
«2019 jyly Qyrǵyzstan Parlamenti Qyrǵyz Respýblıkasynyń Sý Kodeksine ózgertýler men tolyqtyrýlar engizý máselesin talqylaǵan. Qyrǵyz eliniń sol kezdegi Aýyl sharýashylyǵy, tamaq ónerkásibi jáne melıoratsııa mınıstriniń orynbasary Janybek Kerimálıev «Sý týraly zańǵa ózgertýler engizilse, Qyrǵyzstan kórshi elderden sý úshin qarjy talap ete alady» dep málimdegen. Buǵan deıin dál osy máseleni 2000 jyldary Qyrǵyz Parlamentiniń depýtattary kótergen bolatyn. 2019 jylǵy statıstıka boıynsha, Qazaqstan Qyrǵyzstanǵa sý alǵany úshin jylyna 119 mıllıon teńge tólep kelgen. Biraq bul qarjy sýǵa emes, Qyrǵyzstan aýmaǵyndaǵy sý qoımalaryn jóndeýden ótkizýge berilgen. Qytaımen aradaǵy sý máselesi Reseı jáne Qyrǵyzstanmen salystyrǵanda áldeqaıda kúrdeli», - dedi Faızolla Qamenov.
«Qazaqstannyń sý qaýipsizdigi máselesi qalaı sheshilýde? Qazaqstan úshin sý qaýipsizdigi, sýdyń tapshylyǵy aldaǵy 10-20 jylda aldyńǵy qatarǵa shyǵatyny anyq. Ony sheshý úshin qandaı da bir áreketter jasalyp jatyr ma, joq álde bolashaqtyń enshisine qaldyrdy ma, ol jaǵy belgisiz. Joǵaryda baıandalǵannyń negizinde, Sizden osy depýtattyq saýaldy qarap, Úkimettiń osy problemalarǵa qatysty ustanymyn kórsetseńiz», - dedi depýtat Premer-Mınıstrdiń orynbasary R. Sklıardiń atyna joldaǵan saýalynda.