Májilis tóraǵasy depýtattardyń óńirlerge saparynyń nátıjesin aıtty
«Qazirgi jaǵdaıda depýtattardyń halyqpen tyǵyz baılanysy aldyńǵy orynda tur. Sizdiń tapsyrmańyzǵa sáıkes, Fraktsııa óziniń óńirlerdegi jumys formatyn qaıta qarady. Kúni keshe biz óńirlerge baryp keldik. Qoǵamdyq pikir lıderlerimen, sarapshylarmen, halyqtyń áleýmettik jaǵynan osal toptarymen, sondaı-aq konstrýktıvti oppozıtsııa ókilderimen kezdesýler ótti. Kezdesý barysynda áleýmettik qoldaý, kedeıshilikpen kúres, baǵanyń ósýi, jumyspen qamtý máseleleri, sondaı-aq turǵyn úı problemalary jıi kóterildi. Sýmen jabdyqtaý, melıoratsııa, transshekaralyq ózender problemalary da turǵyndardy alańdatyp otyr. Bul másele boıynsha sáýir aıynda Parlamenttik tyńdaý ótkizýdi josparlap otyrmyz», - dedi E. Qoshanov.
Onyń aıtýynsha, jergilikti joldar máselesi men agroónerkásip keshenindegi birqatar ózekti problemalar kóptegen óńirde áli de sheshimin tapqan joq. Mundaı mysaldardy kóptep keltirýge bolady.
«Qoǵamdyq oryndarda, aýlalarda, bazarlarda jastarmen, onyń ishinde mamandyqsyz, jumyssyz júrgen jastarmen ártúrli formattaǵy kezdesýler ótkizildi. Depýtattar memleket tarapynan usynylyp otyrǵan múmkindikter men baǵdarlamalar týraly jastarǵa egjeı-tegjeıli túsindirme berdi. Olardyń da pikiri nazarǵa alyndy. Jergilikti atqarýshy organdardyń ókilderimen birlese otyryp, bul problemalardy odan ári sheshý joldary qarastyryldy. Qazirdiń ózinde jastarmen jumys isteýde jáne volonterlik qyzmette aıtarlyqtaı tájirıbesi bar jas depýtat áriptesterimizden turatyn top qurylýda. Olar osy baǵdarlamalar men jastardyń arasyn jalǵastyratyn «kópir» bolady», - dedi Májilis tóraǵasy.
Sonymen qatar, qańtar oqıǵasy kezinde ustalǵan azamattarmen jáne olardyń týǵan-týysqandarymen, advokattarymen kezdesýler boldy.
«Kezdesýler barysynda olardyń aryz-shaǵymdary tyńdalyp, quzyrly organdardyń nazaryna jetkizildi. Bul másele depýtattardyń baqylaýynda bolady. Depýtattardyń áleýmettik jeliler arqyly halyqqa alda bolatyn saparlary týraly aqparat berip otyrýy jumystyń tıimdiligine oń áser etti. Sonyń nátıjesinde, biz óńirlerde jumysty barynsha dál uıymdastyra aldyq jáne qoǵamnyń suranysyna jedel nazar aýdaryp, aldyn ala áreket ettik. Maqsat bireý – saılaýshylarmyz kótergen máselelerdiń birde-biri qaraýsyz qalmaıdy. Zańnamalyq retteýdi talap etetin máseleler depýtattyq bastamalar aıasynda qaralady. Sonymen qatar, depýtattar jekelegen óńirlerde shuǵyl másele týyndaǵan jaǵdaıda mán-jaıdy anyqtaý úshin jedel issaparǵa shyǵýdy praktıkaǵa engizetin bolady», - dedi Erlan Qoshanov.
