Májilis ónerkásiptik saıasatqa qatysty qujatty birinshi oqylymda maquldady

NUR-SULTAN. QazAqparat – Búgin Parlament Májilisiniń jalpy otyrysynda «Ónerkásiptik saıasat týraly» zań jobasy birinshi oqylymda maquldandy, dep habarlaıdy QazAqparat tilshisi.

«Zań jobasy Memleket basshysynyń ótken jylǵy Qazaqstan halqyna Joldaýynda berilgen tapsyrmasyna sáıkes ázirlendi jáne óńdeýshi ónerkásipti damytýdyń negizgi qaǵıdattaryn, maqsattary men mindetterin aıqyndaıdy. Basty mindet - ónerkásiptiń áleýetin tolyq ashý, osy oraıda Prezıdenttiń tapsyrmasynyń mańyzy óte zor», - dedi QR Indýstrııa jáne ınfraqurylymdyq damý mınıstri Beıbit Atamqulov.

Negizi ónerkásip salasynyń zańnamalyq bazasyn jańartýdyń qajettiligi mynadaı basty faktorlarǵa negizdelip otyr:

- ónerkásiptik saıasatty qaıta qaraý boıynsha batyl sharalardy talap etetin álemdik ekonomıka qysymynyń kúsheıýi.

- ulttyq ekonomıkanyń ózindik jetkiliktiligin qamtamasyz etý úshin bıznestiń naqty júıeli problemalaryn sheshý.

- energetıkalyq resýrstar men shıkizat metaldaryna álemdik baǵalardyń turaqsyzdyǵy jaǵdaıynda ındýstrııalandyrý saıasatynyń rólin kúsheıtý.

- Qazaqstannyń óndiris salasyna qarajat salýǵa múddeli sheteldik ınvestorlar úshin belgi berý.

«Atalǵan faktorlardy nazarǵa ala otyryp, zań jobasynyń maqsaty aıqyndaldy. Ol – básekege qabiletti, joǵary tehnologııalyq, eksportqa baǵdarlanǵan ónim óndirisin ulǵaıtý arqyly sala damýynyń shıkizattyq modelinen ketip, óńdeýshi ónerkásiptiń turaqty damýyn qamtamasyz etý», - dedi mınıstr.

Zań jobasy kelesi negizgi mindetterdi iske asyrýǵa baǵyttalǵan:

1) el halqynyń ál-aýqatyn arttyrý;

2) qazirgi zamanǵy ónerkásiptik ınfraqurylymdy qurý jáne damytý;

3) jańa joǵary tehnologııalyq óndiristerdi damytý;

4) eńbek ónimdiligin arttyrý arqyly óndiristiń básekege qabilettiligin arttyrý;

5) ulttyq ekonomıkanyń ózindik jetkiliktiligin arttyrý.

Zań jobasynda 30-dan astam uǵymdar men termınderdiń anyqtamalary qarastyrylǵan. Olardyń ishinde ónerkásip, óńdeýshi ónerkásip, ónerkásiptik saıasat, Indýstrııa 4.0, shıkizattyq emes eksport jáne ózge de túıindi uǵymdar qamtylǵan.

Osyǵan baılanysty jańa termınderdi reglamentteý tıimdi ónerkásiptik saıasatty qalyptastyrý úshin quqyqtyq negiz jasaıtyn bolady.

Budan buryn habarlanǵandaı , ónerkásiptik saıasat aıasynda bıznes úshin yntalandyrýdyń 20-ǵa jýyq is-sharalary qoljetimdi bolady.

Zań jobasynda sondaı-aq Ónerkásipti damytý qorynyń jumys isteý máseleleri rettelgen. Qor jabdyqtardy satyp alýǵa lızıngtik qarjylandyrý, sondaı-aq 3 paıyzdan aspaıtyn mólsherleme boıynsha ónerkásiptik-ınnovatsııalyq jobalarǵa jeńildikpen kredıt berý sııaqty yntalandyrý is-sharalarynyń operatory bolady.

Munymen qosa Ónerkásiptik saıasat jónindegi vedomstvoaralyq komıssııany qurý kózdelgen.