Májilis medıtsına qyzmetkerleriniń kásiptik jaýapkershiligin saqtandyrýǵa qatysty qujatty maquldady
«Atap aıtqanda, «Halyq densaýlyǵy jáne densaýlyq saqtaý júıesi týraly» Kodekstiń 270-babynda medıtsınalyq kómek kórsetý kezinde patsıenttiń ómirine nemese densaýlyǵyna zııan keltirilgen jaǵdaıda, medıtsına qyzmetkerleriniń kásiptik jaýapkershiligin saqtandyrý quqyǵy zańnamalyq túrde bekitilgen. Osy engizilip otyrǵan zań jobasynda medıtsına qyzmetkerleriniń kásiptik jaýapkershiligin saqtandyrý júıesin kezeń-kezeńimen engizý tetigi men joldary qaralǵan. Nátıjesinde, medıtsınalyq kómektiń sapasyn arttyrýǵa múmkindik beredi. Zań jobasyn daıyndaý barysynda mınıstrlik medıtsına qyzmetkerleriniń kásiptik jaýapkershiligin saqtandyrýdyń dúnıejúzindegi túrli nusqalaryna taldaý júrgizdi», - dedi Densaýlyq saqtaý mınıstri Ajar Ǵınııat.
Onyń aıtýynsha, halyqaralyq tájirıbede medıtsına qyzmetkerlerin qorǵaý úshin qorlar men qaýymdastyqtar (Shvetsııa, Kanada, Danııa) qurý arqyly, sondaı-aq jeke naryqtar (AQSh, Germanııa, Japonııa, Túrkııa) arqyly kásiptik jaýapkershilikti mindetti saqtandyrý júıesi qoldanylady. Óziniń kásiptik jaýapkershiligin saqtandyrý mindeti medıtsına qyzmetkerlerine nemese densaýlyq saqtaý uıymdaryna júktelgen. Joǵaryda aıtylǵan halyqaralyq tájirıbeniń negizinde qazaqstandyq qoǵamnyń damýyn eskerip, medıtsına qyzmetkerleriniń kásiptik jaýapkershiligin saqtandyrýdyń ońtaıly tetigi retinde AQSh, Germanııa, Japonııa jáne Túrkııa modelderi boıynsha saqtandyrýdyń beıimdelgen naryqtyq modeli usynylyp otyr. Osy oraıda qoldanystaǵy saqtandyrý kompanııalary arqyly, sondaı-aq daýlardy sotqa deıingi retteý jolymen iske asyrylmaq.
«Qazir barlyq medıtsınalyq uıymdarda patsıentterdi qoldaý qyzmetin ashyp jatyrmyz. Osy modelge sáıkes, patsıentterdi qoldaý qyzmeti shaǵymdy qaraý kezinde arnaıy komıssııany, sarapshylar men múddeli taraptardy tartyp, medıatsııa elementterin qoldanyp, júzege asyratyn bolady. Bul kezeńde másele medıtsınalyq uıymnyń ózinde rettelýi múmkin. Patsıent atalǵan qyzmettiń nemese komıssııanyń sheshimimen kelispegen jaǵdaıda, shaǵymǵa qatysty saraptamalyq qorytyndy berý úshin bul másele Densaýlyq saqtaý mınıstirligi Medıtsınalyq jáne farmatsevtıkalyq baqylaý komıtetinde qaralatyn bolady. Kemshilikter dáleldengen jaǵdaıda, shaǵym boıynsha materıaldar, onyń ishinde sot-medıtsınalyq saraptamanyń qorytyndysy medıtsınalyq uıym saqtandyrylǵan kompanııaǵa beriledi», - dedi mınıstr.
Onyń aıtýynsha, naýqasqa keltirilgen zııan úshin ótemaqy tóleýdi saqtandyrý kompanııasy júrgizedi. Tólemnen bas tartqan jaǵdaıda, naýqas sotqa júginýge quqyly.
Saqtandyrý jarnasynyń somasy qaýip dárejesine qaraı bekitilgen aktýarlyq esepteýlerdiń negizinde aıqyndalady. Bul turǵyda medıtsına qyzmetkeriniń jaýapkershilik dárejesi eskeriledi.
«Bul joba patsıentterdiń quqyǵyn qorǵaý, medıtsına qyzmetkerleriniń kásiptik qaýipterin azaıtý maqsatynda densaýlyq saqtaý salasyndaǵy jańa baǵyt bolyp otyr. Soǵan baılanysty osy qujatty qabyldaýdyń ýaqyty keldi dep esepteımiz», - dedi vedomstvo basshysy.
Májilistiń Áleýmettik-mádenı damý komıtetiniń málimetinshe, zań jobasynda medıtsına qyzmetkerleriniń kásiptik jaýapkershiligin saqtandyrýdy engizý kózdelgen. Máselen, Densaýlyq saqtaý sýbektileri medıtsına qyzmetkeriniń kásiptik jaýapkershiligin saqtandyrý shartyn jasasýǵa mindetti bolady dep josparlanǵan. Medıtsına qyzmetkerleriniń kásiptik jaýapkershiligin saqtandyrý tártibi medıtsına qyzmetkeriniń kásiptik jaýapkershiligin saqtandyrýdyń úlgilik sharty negizinde taraptardyń kelisimimen aıqyndalatyn bolady.
Zań jobasynda saqtandyrý jarnalarynyń eń tómengi mólsheri aıqyndalǵan. Bul rette, 2025 jyldan bastap kásiptik jaýapkershilikti saqtandyrý jarnalary densaýlyq saqtaý sýbektisi men medıtsına qyzmetkeri arasynda teń úleste júzege asyrylady dep boljanyp otyr.
