Májilis Konstıtýtsııalyq sot týraly zań jobasyn maquldady
Aıta keteıik, 2 qyrkúıekte Májiliste «Qazaqstan Respýblıkasynyń Konstıtýtsııalyq soty týraly» Konstıtýtsııalyq zań jobasy tanystyrylǵan edi.
Konstıtýtsııalyq zań jobasynyń maqsaty - Konstıtýtsııalyq Keńesti Konstıtýtsııalyq sot retinde qaıta qurý bóliginde Konstıtýtsııaǵa engizilgen ózgeristerdi iske asyrý, memlekettiń quqyq qorǵaý ınstıtýttaryn kúsheıtý, negizgi zań erejeleriniń qatań saqtalýyn qamtamasyz etý.
Jalpy, Konstıtýtsııalyq zań jobasy 3 bólimnen, 10 taraýdan jáne 68 baptan turady.
«Sonymen birge, Konstıtýtsııalyq sottyń qurylýyna jáne qyzmetine, sondaı-aq konstıtýtsııalyq is júrgizýdi júzege asyrýǵa baılanysty qoǵamdyq qatynastar rettelgen. Osy rette zań jobasynda Konstıtýtsııalyq sot sýdıalarynyń quqyqtyq mártebesi, ony qalyptastyrý tártibi, sýdıalarynyń mártebesi jáne olardyń qyzmetiniń kepildikteri jáne Konstıtýtsııalyq sottyń quzyreti, ony júzege asyrýdyń uıymdastyrýshylyq nysandary aıasynda mańyzdy normalar qamtyldy», - dedi Májilis depýtaty, zańnama jáne sot-quqyqtyq reforma komıtetiniń múshesi Názıla Razzaq palatanyń jalpy otyrysynda.
Depýtat zań jobasy boıynsha jumys tobynyń 17 otyrysy ótkenin aıtty.
«Onyń qaraýyna zań tehınkasy erejelerine sáıkes keltirý, redaktsııalyq naqtylaý baǵytynda túzetýler kelip tústi. Budan basqa zań jobasyn talqylaý kezinde keıbir normalardy Ata zańǵa jáne qoldanystaǵy zańnamaǵa sáıkestendirýge arnalǵan ózgerister qaraldy. Depýtattardyń barlyq túzetýleri qabyldanyp, salystyrmaly kestede kórsetildi», - dedi depýtat.
Buǵan deıin Ádilet mınıstri Qanat Mýsın Konstıtýtsııalyq sottyń quzyretine qatysty túsinik bergen.
Konstıtýtsııalyq sot el aýmaǵynda Ata Zańnyń ústemdigin qamtamasyz etetin organ bolady.
Konstıtýtsııalyq sotta ótinishterdi qaraý rásimi jalpy sottardaǵy tártipten ózgeshe bolady.
Konstıtýtsııalyq sotqa qurmetsizdik kórsetkenderge 61 myń teńge aıyppul salynýy múmkin.
