Májilis depýtaty Ulttyq memlekettik kitap palatasynyń múshkil haline alańdaýshylyq tanytty
«El Prezıdenti Qasym-Jomart Toqaev óz Joldaýynda «Qoǵamdy uıystyrý, ulttyq biregeılikti nyǵaıtý isinde elimizdiń tarıhı murasyn jáne mádenı áleýetin tıimdi paıdalanýǵa mán beriledi» degen edi. Nur Otan partııasy da mádenı qundylyqtarymyzdyń saqtalýy men órkendeýin únemi qoldaıdy. Osyǵan oraı saýalymyzǵa negiz bolǵan naqty másele - Mádenıet jáne sport mınıstrligine qarasty Ulttyq memlekettik kitap palatasynyń búgingi tańdaǵy múshkil halin aıtpaqpyn. Bul mekeme – memlekettiń tarıhy men ult rýhanııaty úshin asa mańyzdy mekeme. Búginde Ulttyq memlekettik kitap palatasynyń Baspasóz muraǵatynda alty mıllıonǵa jýyq kitaptar men gazet-jýrnaldardyń mindetti danasy saqtaýly tur. Eń kóne jádigerlerdiń shyqqan ýaqyty 1890 jyldarǵa tıesili», - dedi Maqpal Tájmaǵametova QR Premer-Mınıstriniń orynbasary Eraly Toǵjanovqa depýtattyq saýal joldaǵan.
Onyń dereginshe, Ulttyq memlekettik kitap palatasy Almaty qalasy, Pýshkın kóshesi 2-úı mekenjaıynda ornalasqan. Ǵımarattyń birinshi qabatynda mekeme qyzmetkerleri otyrsa, muraǵat qory osy ǵımarattyń janyndaǵy úsh qabatty úıde ornalasqan shaǵyn qoımada saqtaýly. Munda muraǵatpen qatar qaptaǵan saýda oryndary, ashana men monsha da bar. Qarama-qarsy bette janarmaı beketi jumys istep tur. Budan bólek, muraǵatqa qyzmetkerler de, izdenýshiler de jumysy saıabyrsymaıtyn bazar ústimen ótedi.
«Kóktemde erigen sý da mekeme úshin úlken másele bolyp otyr. Mekeme qyzmetkerleri mundaı ýaqyttarda qural-saımanyn alyp qar kúreıdi, sý aqqan tustardy bekitedi. Degenmen, ylǵaldy temperatýra, syz jáne bý, ashana qaldyqtaryna ósh kemirýshilerdiń qaǵaz ónimderine barynsha keri áserin tıgizip jatqany aıtpasa da túsinikti. Úsh jyl buryn muraǵatpen irgeles ornalasqan monshadan órt shyǵyp, mundaǵy alty mıllıonǵa jýyq qundy kitaptar bir qaterden qalǵan. Tótenshe jaǵdaı dabyl qaqsa da, qam-qareketsiz júrmiz. Mundaı nemquraıdylyqpen ǵasyrlyq tarıhy bar qundy kitaptarymyzdan aıyrylyp qalýymyz múmkin», - dedi ol.
Májilis depýtatynyń atap ótýinshe, Halyqaralyq standart boıynsha qaǵaz ónimderiniń eń uzaq saqtalatyn ýaqyty – 200 jyl. Eki ǵasyrdan astam ýaqyt asa mańyzdy tarıhı jádigerlerdi saqtaý úshin muraǵat ǵımaratynda qajetti tehnıkalardyń, hımııalyq qospalardyń, turaqty temperatýrany qamtamasyz etetin qurylǵylardyń bolýy shart. Muraǵat standarttaryna sáıkes jaǵdaı jasalmaǵandyqtan, mundaı apattardyń oryn alýy ábden múmkin. Bul másele buǵan deıin birneshe ret kóterilgenimen, óz kezeńinde sheshilmegen.
«Almaty qalasynyń ákimdiginen mekemeni kóshirýge qajetti orynnyń joqtyǵy týraly jaýap ta kelgen. Osy máselege qatysty kelesini usynamyn. Birinshiden, trıhı, ǵylymı, áleýmettik, ekonomıkalyq, saıası, mádenı respýblıkalyq mańyzy bar kitaphanalar men kitap palatasynyń jalpyǵa qol jetimdiligin qamtamasyz etý úshin, bul mekemelerdiń túgeldeı tehnıkalyq jaǵdaıy rettelýi kerek. Ekinshiden, memlekettik mekemelerdi, kitaphanalardy jáne halyqty bıblıografııalyq aqparatpen, shejiremen, anyqtamalyqtarmen qamtamasyz etetin kitap palatasynyń muraǵat qoryn saqtaýdy jiti nazarda ustaý qajet. Muraǵat isin jetildirý, materıaldyq-tehnıkalyq bazasyn jańǵyrtý isi talapqa saı júrgizilýi abzal. Sondyqtan da Ulttyq memlekettik kitap palatasy tez arada qaýipsiz jerge kóshirilip, sapaly deńgeıde jumysyn jalǵastyrýy tıis», - dedi Maqpal Tájmaǵametova.
