Májilis depýtattary Kaspıı teńiziniń ekologııalyq jaǵdaıyna qatysty qujatty maquldady

NUR-SULTAN. QazAqparat – Parlament Májilisiniń jalpy otyrysynda «Kaspıı teńiziniń ortasyn qorǵaý jónindegi negizdemelik konventsııaǵa Kaspıı teńizin jerústi kózderinen jáne qurlyqta júzege asyrylatyn qyzmet nátıjesinde lastanýdan qorǵaý jónindegi hattamany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Kaspıı teńizinde kómirsýtek shıkizatynyń iri qorlarynyń bolýy sý aıdynynyń ekologııasy men bıoresýrstaryn saqtaý týraly máseleni ózektendiredi. Hattamanyń negizgi maqsaty - Kaspıı teńiziniń ekologııalyq taza teńiz ortasyna qol jetkizý jáne sol qalpynda ustaý úshin jerústi kózderinen ári qurlyqta júzege asyrylatyn qyzmetter nátıjesinde teńiz ortasynyń lastanýyn boldyrmaý, báseńdetý, baqylaý jáne barynsha múmkin bolatyn apattardy joıý», - dedi QR Ekologııa, geologııa jáne tabıǵı resýrstar mınıstri Serikqalı Brekeshev.

Hattamanyń negizgi baǵyttary:

- eń ozyq qoljetimdi tehnologııalardy jáne tabıǵat qorǵaý praktıkasyn paıdalaný ári olardy teńiz akvatorııasynda júzege asyrý kezinde berý;

- Kaspıı teńiziniń teńiz ortasy men jaǵalaý mańyndaǵy aýdandarynyń fızıkalyq, bıologııalyq jáne hımııalyq sıpattamalary týraly derekter bazasyn qurý men júrgizý;

- Kaspııdiń teńiz ortasy men jaǵalaý mańyndaǵy aýdandarynyń jaı-kúıine, onyń jaǵalaý jıegi boıyndaǵy teńizdiń lastaný deńgeıine turaqty baǵalaý júrgizý bolyp otyr.

«Hattama boıynsha teńiz ortasyna áser etýi múmkin qyzmet túrleriniń tizbesi aıqyndalǵan. Konventsııaǵa sáıkes taraptar ózderiniń ulttyq zańnamasy boıynsha qorshaǵan ortaǵa áserdi baǵalaýdy qosa alǵanda, Kaspıı teńiziniń teńiz ortasyn jáne jaǵalaý mańyndaǵy aýdandaryn lastanýdan qorǵaý úshin qajetti is-sharalarǵa jergilikti bılik organdary men jurtshylyqtyń qatysýyna yqpal etedi. Sondaı-aq, árbir tarap qoǵamnyń Kaspıı teńiziniń teńiz ortasy men jaǵalaý mańyndaǵy aýdandarynyń jaı-kúıi týraly aqparatqa qol jetkizýin jeńildetedi. Hattama múddeli organdarmen eskertýlersiz kelisildi, teris áleýmettik-ekonomıkalyq saldarǵa ákep soqtyrmaıdy», - dedi mınıstr.