Majarstanda eń úlken «Edil qaǵan» kıiz úıi tigildi
2011 jyldan beri ótkizilip kele jatqan sharaǵa Majarstan, Mońǵolııa, Túrkııa, Ázerbaıjan, Ýkraına, Aýstrııa, Germanııa, Serbııada turyp jatqan túrki halyqtary qatysty.
«Babalar kúni» erte túrki-ǵun mádenıeti men dástúrin jańǵyrtýǵa baǵyttalǵan. Sharaǵa sondaı-aq Qazaqstannyń Majarstandaǵy elshiliginiń ókilderi qatysty. Qazaqstan elshiliginiń birinshi hatshysy Edil Myrzahanovtyń aıtýynsha, júz myńnan astam adamnyń basyn qosatyn «Babalar kúni» - eki el arasyndaǵy mádenı, ǵylymı yntymaqtastyqty damytýǵa, baýyrlas halyqtardyń birligin nyǵaıtýǵa yqpal etedi.
13-15 tamyz aralyǵynda ótken sharada álemniń eń úzdik sadaqshylary óneri kórsetip, ıt júgirtip, qus salý syndy saıatshylyq dástúr dáripteldi. Sondaı-aq ǵun men avar murasyn usynatyn majar ǵalymdarynyń arheologııalyq, antropologııalyq eńbekteri qoıylǵan kórme - álemdegi eń úlken kıiz úı «Edil qaǵan» shatyrynda ornatyldy. Baǵdarlama aıasyndaǵy dástúrli mýzyka keshinde tanymal óner sheberleriniń oryndaýyndaǵy túrki halyqtarynyń áýederi shyrqaldy. Kópshiliktiń kóńilinen shyqqany – baqsylardyń án-jyry, shańqobyzǵa arnalǵan kompozıtsııalar, kómeımen án aıtý epıkalyq jáne aspaptyq shyǵarmalar.
Sondaı-aq qolóner jármeńkesine jınalǵan sheberler toqyma matadan, kıizden jasalǵan buıymdaryn, altyn-kúmis áshekeılerin, biregeı sývenırler, ydys-aıaq, mýzykalyq aspap, qarý -jaraq túrlerin usyndy. Shara barysynda otbasylarǵa, balalarǵa arnaıy kıiz úı tigilip, onda jasóspirimderdiń shyǵarmashylyq áleýetin damytýǵa, qolónerge baýlýǵa arnalǵan sharalar uıymdastyryldy. Aýdaryspaq, kókpar tartý, sadaq atý jarystary, qylyshtasý, kóshpendiler qalashyǵy, áskerı parad, ulttyq kıim kórsetilimderi merekesiniń kórkin qyzdyrdy.
Atap óteıik, «Babalar kúni» - dástúrli festıval ǵana emes, sonymen qatar túrki halyqtarynyń óz tarıhyn túgendep, ana tili men tól mádenıetinen qol úzbeýge, otbasylyq qundylyqty saqtaýǵa, otansúıgishtikke tárbıeleıtin mereke.
«Majar-Turan» qorynyń prezıdenti, antropolog Andrash Bıronyń aıtýynsha, «Babalar kúni» sharasy – Karpat qoınaýyndaǵy majarlardyń yntymaqtastyǵynyń kórsetkishi ǵana emes, kóshpeli ǵundar men túrki tekti jurttardyń búgingi muragerleriniń ortaq merekesine aınaldy.
«Áýelgi maqsatymyz – joǵary deńgeıdegi, keshendi is-sharany dúnıege ákelý, sol arqyly babalarymyzǵa qurmet kórsetip, olardyń muraǵa qalǵan úlgi-ónegeni dáripteý bolatyn. Sol maqsat búginde oryndalyp keledi», – deıdi Andrash Bıro.
Eske sala ketsek, shildede Majarstanda kóshpendi halyqtardyń ulttyq sport túrlerinen halyqaralyq saıys ótken bolatyn.
