Majarstanda Almaty mýzeıler birlestiginiń kórmesi ashyldy
ASTANA. KAZINFORM - Majarstannyń Kartsag Kınche óner ortalyǵynda Almaty qalasy mýzeıler birlestiginiń «Qazaqstan kóshpendileri: tarıhy men búgini» kórmesiniń ashylý saltanaty ótti.
Kórme Almaty qalasy ákimdiginiń qoldaýymen jáne Qazaqstan Respýblıkasynyń Majarstandaǵy Elshiligimen birlesip uıymdastyryldy.
Kórmeniń maqsaty – Qazaqstan men Majarstan arasyndaǵy mádenı baılanystardy odan ári nyǵaıtý, sondaı-aq Uly dala halqynyń tarıhy men mádenıetimen – jalpy kóshpendiler mádenıetimen, atap aıtqanda kóshpeli qazaqtardyń dástúrlerimen, turmysymen, fılosofııasymen jáne dúnıetanymymen tanystyrý.
Eki bólimnen turatyn kórmeniń alǵashqy bóliginde qazaq halqynyń turmys-tirshiligi men salt-dástúrin sıpattaıtyn eksponattar jáne mýzykalyq aspaptar usynylǵan. Al kórmeniń kelesi bóliminen Almaty shaharynyń ásem tabıǵaty men zamanaýı kelbetin kórsetetin fotosýretterdi tamashalaýǵa bolady.
Ekspoztsııaǵa 200-den astam zat qoıylǵan. Basty eksponattardyń biri – Abaıdyń dombyrasy men XIII ǵasyrda Almaty aýmaǵynda soǵylǵan kúmis teńgeler (dırhemder).
Kórmeniń ashylýynda sóz sóılegen Qazaqstannyń Majarstandaǵy Elshisi Abzal Saparbekuly myrza mádenı sharanyń mańyzyna toqtaldy.
«Eýropanyń kindiginde segiz ǵasyr boıy óz mádenıeti men ata-babalarynyń rýhanı qundylyqtaryn saqtap, búgingi kúnge deıin gúldenip kelgen qypshaqtarǵa Uly daladaǵy qazaqtardyń mádenı qundylaqtaryn tanystyrý – búgingi urpaqqa mindet. Majarstanda turatyn qypshaq aǵaıyndarmen tyǵyz qarym-qatynas ornatýǵa úlken kóńil bóletinimizdi atap ótkim keledi. Sizderdiń eki memleket arasyndaǵy «altyn kópir» ekenderińizge senimim mol. Majarlar halqynda «Jaqsy dos altynnan da qymbat» degen jaqsy sóz bar. Biz barynsha aramyzdaǵy strategııalyq seriktestikti odan ári tereńdetip, jańa deńgeıge kóterýge múddelimiz», - dedi A.Saparbekuly.
Kartsag qalasynyń meri Tıbor Sepeshı kórmege qoıylǵan eksponattardan ortaq dúnıelerdiń kóp ekenin atap ótti.
«Kórmeniń Kartsag qalasynda ótýi – men úshin úlken mártebe. Búgingi kórmeden qazaq halqynyń turmysy, salt-dástúri, qoldanbaly óneri jaıly baıandaıtyn etnografııalyq jádigerlerdi kóre alamyz. Kórme arqyly kóp dúnıeniń ortaq ekenin baıqaýǵa bolady», - dedi T.Sepeshı.
Almaty qalasy mýzeıler birlestiginiń dırektory Lázzat Saǵyndyqovanyń aıtýynsha, mundaı jobalar aldaǵy ýaqytta da jalǵasyn taýyp, eki eldiń arasyndaǵy dostyqqa septigin tıgizbek.
«Bul kórmeniń Majar qypshaqtarynyń astanasy – Kartsag qalasynda uıymdastyrylýy zor mártebe. Kartsag qalasy eki el arasyndaǵy mádenı kópirge aınalǵan tarıhı mańyzy bar qala. Mundaı birlesken jobalar aldaǵy ýaqytta jalǵasyn tabady den senemin. Kórmeni uıymdastyrýǵa múmkindik jasaǵan Almaty qalasynyń ákimdigi men Qazaqstannyń Majarstandaǵy Elshiligine jáne majarlyq áriptesterime rızashylyǵymdy bildiremin», - dedi L.Saǵyndyqova.
Kórmeniń ashylýyna kelgen kópshilik belgili kúıshi, dombyrashy Erkin Qudaıbergenniń oryndaýyndaǵy tanymal kúıler men belgili qazaq kompozıtorlarynyń shyǵarmalaryna qoshemet kórsetip, qazaqtyń ulttyq taǵamdarynan dám tatty.
Aıta óteıik, kórme Kartsag Kınche óner ortalyǵynda 2024 jylǵy 20 qarashaǵa deıin jalǵasyn tabady.
