Majarstan EO-nyń mıgratsııalyq aıyppulyna qarsy sotqa júgindi
ASTANA. KAZINFORM – Majarstan EO Sotyna shaǵym túsirip, mıgranttardy qabyldaýdan bas tartqany úshin salynǵan aıyppuldy joıýdy talap etti. Bul týraly TASS habarlady.
Majarstan Eýropalyq Odaqtyń sotyna shaǵym túsirip, elge mıgranttardy qabyldaýdan bas tartqany úshin kún saıyn salynatyn 1 mıllıon eýro aıyppuldy joıýdy talap etti. Bul týraly el premer-mınıstriniń qaýipsizdik jáne zańsyz mıgratsııamen kúres jónindegi bas keńesshisi Derd Bakondı málimdedi.
Onyń aıtýynsha, ótken jyly Lıýksembýrgtegi EO Soty Eýrokomıssııanyń bastamasymen Majarstanǵa 200 mıllıon eýro aıyppul salǵan. Buǵan eldiń Eýroodaqtyń ortaq mıgratsııalyq paktine baǵynýdan bas tartýy sebep boldy. Sheshim oryndalmaǵan ár kún úshin qosymsha 1 mıllıon eýro eseptelip otyr. Bir jyldyń ishinde aıyppul somasy 500 mıllıon eýrodan asyp ketken.
— EO bosqyn mártebesin berý týraly ótinishter úshinshi elderde emes, mysaly, Serbııada emes, Majarstan aýmaǵynda qaralýy tıis dep talap etip otyr. Bul shyn máninde shekaralardy zańsyz mıgratsııaǵa ashýdy bildiredi. Mundaı jaǵdaıda úkimettiń jalǵyz joly EO sotyna qarsy shaǵym berý, — dedi Bakondı M1 telearnasyna bergen suhbatynda.
Ol Majarstan úkimeti aıyppuldyń ózin de, ósimin de tóleýden bas tartyp otyrǵanyn, sondaı-aq EO-nyń mıgratsııalyq erejelerine baǵynbaıtynyn rastady.
— Majarstan shekara baqylaýynyń qazirgi júıesin saqtaıdy jáne EO sotynyń bul alalaýshylyq sheshimin halyqaralyq zańgerlik kompanııa arqyly qaıta qaraýǵa umtylady, — dedi keńesshi.
Bul isti quramynda EO Sotynyń burynǵy eki múshesi bar bedeldi halyqaralyq zańgerlik fırma júrgizedi. Úkimet onyń qyzmetin tóleýge 1,5 mıllıon eýro bóledi.
2024 jyly shyǵarylǵan sot sheshimine sáıkes, Majarstan EO-nyń ortaq mıgratsııalyq saıasatyna kelispeıinshe jáne ulttyq zańdaryn eýropalyq normalarǵa sáıkestendirmeıinshe, aıyppul kólemi óse beredi. Aıyppul EO bıýdjetinen Majarstanǵa tıesili qarjydan óndirilip alynýy múmkin.
Sarapshylar EO Sotynyń sheshimin qaıta qaraý óte kúrdeli, biraq múmkin emes dep sanaıdy. Qoldanystaǵy protsedýralarǵa sáıkes, sheshimdi qaıta qaraý úshin túzetý, túsindirý nemese qaıta qaraý týraly ótinish berý joldary bar. Aldyńǵy úkimdi ózgertý nemese joıý, jańa mán-jaılardyń ashylýyna nemese sheshim kezinde jiberilgen zańdyq qatelikke baılanysty múmkin bolady.