Maıqaıyńda qos qutqarýshyny izdeý jumysynyń sońy suıylyp barady
PAVLODAR. KAZINFORM - Qurdym túbinde jatqan qos azamattyń týystary izdeý jumystaryn toqtatpaýdy ótinip otyr. Tótenshe jaǵdaı qyzmetiniń mamandary izdeý jumystarynyń endigi taǵdyryn altyn kenishiniń basshylyǵy sheshýi kerek degen baılam jasady. Al «Maıqaıyńaltyn» AQ ókilderi óńirlik departament kerisinshe bar jaýapkershilikti bizge artyp otyr degen pikirde.
«Maıqaıyńaltyn» AQ aqpan aıynyń sońynda kenishtegi qurdymǵa qulaǵan avtobýs pen onyń ishindegi eki azamatty izdeý jumystaryn toqtatyp tastaǵany týraly habarlaǵan edik.
Avtobýsta qalǵan eki adamnyń bireýi - kásibı áskerılendirilgen avarııalyq-qutqarý qyzmetteriniń ROSh Pavlodar fılıaly qutqarý qyzmetiniń jedel aldyn alý jumystary jónindegi vzvod komandıriniń orynbasary Aıdos Shaımerden. Ekinshisi – avtobýs júrgizýshisi Aıyp Tileýbergenov. Eki aıdan astam ýaqyt tabylmaı jatqan qos azamattyń týystary izdestirý-qutqarý jumystary túbegeıli toqtap qala ma dep alańdap otyr.
Pavlodar oblysy tótenshe jaǵdaılar departamentiniń bastyǵy Jasulan Jumashev qalyptasqan ahýaldy bylaı dep túsindirdi:
- Bizdiń boljamymyz boıynsha, apat oryn alǵan kúni tabylǵan qos qutqarýshy (Sarqyt Berdiqan, Oleg Tyshkevıch) avtobýstyń artqy esiginen qulap ketken bolýy múmkin. Al júrgizýshi men taǵy bir qutqarýshy salonda qalǵan bolýy kerek. Jergilikti qutqarýshylar kásibı áskerılendirilgen avarııalyq-qutqarý qyzmetiniń qyzmetkerlerimen birge bir aı boıy (4 qańtar – 4 aqpan aralyǵy) qutqarý jumystaryn qarqyndy túrde júrgizip kelgeni málim.
Alaıda jer astyn radarmen barlaǵan «GRP-RIDDER-GROUP» JShS oıyq mańaıyndaǵy topyraqtardyń bosaı bastaǵanyn jáne jerasty keńistikteriniń jıileı túskenin eskertip, jumystardy odan ári jalǵastyrý adamdar men tehnıka úshin óte qaýipti ekenin habarlady. Soǵan oraı biz qutqarý jumystaryn aqpan aıynyń basynda doǵardyq. Deıturǵanmen, «Maıqaıyńaltyn» aýyr tehnıkanyń kómegimen búıirlik transheıalardy keńeıtip, oıyqtyń túbine deıingi apparelin tereńdete bastaǵan. Alaıda olar jumysty sońyna deıin jetkizbedi. Sebebi qoldarynda ınjenerlik-geologııalyq joba joq. Al ondaı joba bolmasa, olardyń qyzmetkerleri turmaq, bizdiń qutqarýshylar da jumysqa kirise almaıdy. ıAǵnı adamdardyń qaýipsizdigin tolyqtaı óz jaýapkershiligine alatyn saraptama kerek.
Áý bastan-aq kásiporyn basshylyǵyna áýeli oıyq túbindegi jer jynysyna saraptama júrgizý kerektigi eskertilgen. Biraq olar muny áli kúnge jasamaı otyr. Aıtýlarynsha, kásiporynda qarajat joq. Al jumystardy túbegeıli toqtatý nemese jalǵastyrý týraly sońǵy sheshimdi kenish qojaıyndary ǵana aıta alady. Zańda tabıǵat paıdalanýshynyń aýmaǵynda bolǵan tótenshe jaǵdaıǵa sýbekti ózi jaýap beretini kórsetilgen.
Al «Maıqaıyńaltyn» AQ bas dırektory Qýanysh Botın sońǵy sheshimdi biz emes, tótenshe jaǵdaılar organdary aıtýy kerek degen pikirde.
«Tótenshe jaǵdaılarǵa qatysty qaǵıdalar men erejelerdi qarap shyqtym. Onda apat oryn alǵan jerdi qorshaý men kúzetý - kásip ıesiniń jaýapkershiliginde dep qana kórsetilgen. Biz aýmaqty qorshap, basyna kúzet qoıdyq. Injenerlik jobany ázirleýge mindetti emespiz. Óńirlik tótenshe jaǵdaılar departamenti barlyq kiná men jaýapkershilikti bizge artyp qoıǵysy keletini baıqalady. Kásiporyn basshylyǵy jumystardy toqtatý týraly sheshim shyǵara almaıdy, sebebi ol bizdiń quzyrymyzǵa enbeıdi. Meniń oıymsha, qutqarýshylar qoldarynan eshteńe kelmeıtinin bilip, syrǵyp ketti. Olarǵa bul jumystardy jalǵastyra berýge bolatyn edi. Bizde avarııalyq-qutqarý sharalarymen aınalysatyn kásibı ári bilikti mamandar joq. Qandaı jumystar júrgizý kerektigin de bilmeımiz. Buǵan deıin apparel joldy týystarynyń ótinishi boıynsha salǵan edik. Biraq ári qaraı jalǵastyra almaımyz, sebebi bizge eshkim ruqsat bermeıdi», - deıdi ol.
Buǵan deıin de jazǵanymyzdaı, Qonaev atyndaǵy taý-ken isi ınstıtýtynyń mamandary kenish shahtalaryna túsip, olardyń shahterler úshin qanshalyqty qaýipsiz ekenin tekserip jatyr. Mamandar oń sheshim shyǵarsa, sáýir aıynda kenish qaıtadan jumysyn jalǵastyrýy múmkin.
Kenish basshylyǵy eger shahta qaıta iske qosylatyn bolsa, qutqarý-izdestirý jumystaryna eshqandaı kedergi bolmaıtynyn naqtylady. Sebebi ken qazylatyn shahta uńǵymalary ózge bólikte ornalasqan.
Aıdos Shaımerdenniń jary Nursulý Shaımerdenge habarlastyq. Nursulý kúıeýi alǵash joǵalǵan kúnnen-aq shyryldap, qutqarý jumystaryn toqtatpaýdy ótinip surap júr. Onyń sózinshe, qazir «Maıqaıyńaltyn» AQ men kásibı áskerılendirilgen avarııalyq-qutqarý qyzmetteriniń ROSh Pavlodar fılıaly arasynda bir eregis paıda bolǵandaı.
«Maıqaıyńaltynda» geologııalyq skanerdiń nátıjeleri boıynsha jumysty toqtatýǵa qatysty «SoıýzGeoMeh» JShS-niń usynymdary ǵana bar. Al kásiporyn basshysy Qýanysh Sovetuly prokýratýradan qońyraý shalynyp, jumysty doǵaryńdar degen pármen berildi deıdi. Meniń qolymda bar derekterge súıensek, ınjenerlik joba jasap berýge bir fırma kelisip, qyzmeti úshin 140 mln teńge qarajat suraǵan. Biraq aktsıonerlik qoǵamnyń bas dırektorynyń keńesshisi Orynjan Qabdolov odan úzildi-kesildi bas tartqan. O.Qabdolov kásiporyndaǵy barlyq sharýany ózi júrgizedi, artyq qarjy shyǵyndaǵysy joq. Q.Botın onyń aıtqanynan shyqpaıtyn adam. Bul máseleni kenttiń barlyq turǵyndary jaqsy biledi. Onyń ústine bular meniń joldasym tabylmaı jatqan oıyqqa endi adam túgili, tehnıkalardy attap bastyrmaımyz dep qorqytyp otyr. Kásibı áskerılendirilgen avarııalyq-qutqarý qyzmetiniń basshylyǵy saraptama jasaýǵa 4,5 mln teńge bólip otyrǵanyn aıtqan, alaıda ózge bóligin «Maıqaıyńaltyn» bergisi kelmepti. Kenish túbine aýyr tehnıka túsirýge arnalǵan apparel joldyń 20 paıyzy ǵana qaldy. Sony aıaqtasa, arystaı qos azamatty tez qazyp alar edi. Jebesi 19 metrlik ekskavatordy da izdep taptyq. Ókinishke qaraı, bizdiń ótinishterimizdiń barlyǵy aıaqasty etilip jatyr. Máseleni aıtyp barmaǵan jerimiz joq, Prezıdent Ákimshiliginde de boldyq», - dep muńyn shaqty Nursulý Shaımerden.
Sóz sońynda ol óz kúıeýiniń tiri ekenine eshqandaı úmiti joq ekenin, qutqarýshylar múrdesin qazyp berse, arýlap jer qoınyna tapsyrý sońǵy tilegi ekenin jetkizdi.
