Máıitten aǵzany alý kezinde dárigerler zań talabyn basshylyqqa alady - QR DSM

ASTANA. QazAqparat - Densaýlyq saqtaý uıymy máıitten aǵzany nemese aǵzanyń bir bóligin eger kóz jumǵan adam tiri kezinde aǵzany alýǵa kelispeıtin málimdemesin jetkilikti rásimdemegen jaǵdaıda ala alady.

ıAǵnı, tinderdi jáne aǵzalardy  transplanttaý jáne olardy alý barysynda dárigerler  «Halyq densaýlyǵy jáne densaýlyq saqtaý júıesi týraly» QR Kodeksiniń 169-baby 10 tarmaǵyna sáıkes áreket etedi. Bul týraly Densaýlyq saqtaý mınıstrliginiń baspasóz qyzmeti habarlady.

«Eger aǵzalardy nemese onyń bóligin alý kezinde densaýlyq saqtaý uıymyna osy adam tiri kezinde ne onyń jubaıy, jaqyn týystary nemese zańdy ókilderi ol ólgennen keıin onyń tinderin jáne  aǵzalaryn retsıpıentke transplanttaý úshin alýǵa kelispeıtinin málimdemegen bolsa onda jol beriledi. Osyndaı zań tujyrymy Eýropanyń kóptegen elderinde qoldanysta. Basqasha aıtqanda medıtsına mekemesinde ólgen adamnyń mıy jumys isteýin toqtatqanda dárigerler onyń aǵzalaryn alyp soǵan muqtaj naýqasqa transplanttaı alady», - dep atap ótilgen mınıstrliktiń taratqan habarlamasynda.

Budan buryn habarlaǵanymyzdaı , Aqtóbede dárigerler qaıtys bolǵan 22 jastaǵy jigittiń qos búıregin alyp týǵan-týystarynyń ruqsatynsyz ózge eki naýqasqa salyp bergen.

Marqumnyń týystary bul týraly tek  máıithanada ǵana  bilgen jáne prokýratýra men polıtsııaǵa aryzdanǵan.

Qazaqstanda donorlyq aǵzalardy transplanttaý otalaryn jasaý jyl ótken saıyn kóbeıe túsýde.

 Eger 2013 jyly  164 ota jasalsa, 2016 jyly 306-ǵa artty.

Búgingi tańda elimizde 3,5 myń adam aǵzalardy aýystyryp ornalastyrýdy kútýde. Olardyń basym bóligi - 2 700 adamǵa búırek transplanttaýy qajet.

500-ge jýyq naýqasqa - baýyr, 150 qazaqstandyqqa - júrek, 4 adamǵa ókpe donory kerek.