Maıdannan elge jeti jyldan keıin oraldym – Lev Dorofeev
Lev Ivanovıch 1926 jyly 1 tamyzda Jympıty (qazirgi Syrym) aýdanynda dúnıege kelgen.
Óziniń aıtýynsha, 1943 jyly áskerge shaqyrylyp, Bashqurtstannyń Belıbeı qalasynda baılanysshylar daıyndaıtyn bólimde sheberligin jetildiredi. Onyń Ekinshi dúnıejúzilik soǵysta baılanysshy bolýy tegin emes, tipti qannan berilgen dep aıtýǵa bolady. Óıtkeni ákesi, 1895 jyly dúnıege kelgen Ivan Dorofeev Oral qalasynda baılanys salasynda qyzmet atqarǵan. Ótken ǵasyrdyń jıyrmasynshy jyldary qazaq tilinde erkin sóıleıtin ony Jympıty, Qaratóbe aýdandarynda poshta, radıo baılanysyn qalpyna keltirýge jiberedi.
«Óz qyzmetin adal atqaratyn ol araqty tatyp almaıtyn.
Sony kúndegen tentekter onyń aýzyna zorlap araq quıyp, sodan ushyndy ma, aýrý taýyp, 1928 jyly ómirden erte ketip qaldy. Apam Natalıa ekeýmizdi anamyz Lıdııa Feoktıstovna mápelep ósirdi. Tis dárigeri mamandyǵyn alǵan apam Qostanaıda júrgen jerinen áskerge suranyp, ol da maıdanǵa ketti. Batys Mońǵolııa jaqta bolyp, elge aman-esen oralyp, 84 jasynda dúnıeden ozdy», deıdi Lev Dorofeev.
Maıdanger 1944 jyly 1 tamyzda dál on segiz jasqa tolǵan kúni alǵashqy shaıqasqa qatysady. Osy aıqasta aýyr jaraqat alǵan jaýynger tórt aı emdelip, qatarǵa qaıta qosylady.
Áýeli Belarýs jerinde bolǵan ol І Prıbaltıka maıdany 879-atqyshtar polkine jiberiledi. Polk quramynda Latvııa, Lıtva jerin jaýdan azat etý urystaryna qatysady.
Qandykóılek joldasy Nıkolaı Bondarenko (ol da Jympıtydan) ekeýine rota men batalon komandırleri arasyndaǵy úzdiksiz baılanysty qamtamasyz etý tapsyrylady. Latvııa jerinde oń jambasynan aýyr jaraqat
alyp, aıaǵynan aıyrylý qaýpi týady. Degenmen gospıtalda emdelip shyǵady.
Jeńisti Shyǵys Prýssııada, Baltyq teńizi jaǵalaýynda qarsy alǵan L.Dorofeev soǵys kezinde eki márte «Erligi úshin» medalimen marapattalǵan. «Jaraly bolyp, gospıtalǵa túskendikten bolar, medaldiń bireýi ýaqtyly qolyma tımedi. Jetpis jyldan keıin balam ınternet arqyly tapty», deıdi ol.
Soǵys bitkennen keıin Mońǵolııaǵa jiberilip, odan keıin bes jyldaı Qytaıdaǵy Port-Artýrda qyzmet etedi.
1950 jyly áýeli anasy men apasy turatyn Reseıdiń Ýlıanov oblysyna baryp, kombaınshy retinde eńbek etedi. Anasy «Balam, elge qaıtaıyq» degennen keıin týǵan jeri Jympıtyǵa oralyp, kásiptik-tehnıkalyq ýchılışede mehanızator, óndiristik oqytý sheberi, keńsharda slesar bolady.
«Bizdiń áýlettiń ereksheligi, bári de qazaq tilinde erkin sóıleıdi. Ózim qazaq balalaryna ana tilinde sabaq berdim.
Jubaıym Alla ıAkovlevna qazirgi Qaztalov aýdany Aqpáter aýylynan edi, ómir boıy mektepte ustazdyq etti. Qaıtys bolǵanyna jeti jyl boldy. Uldarym ıÝrıı men Sergeı qazaq tilinde oqydy. Sergeı jumys jaǵdaıyna baılanysty
Reseıdiń Sýrgýt qalasynda turady. Qyzym Elena Máskeýde jıyrma jyldan astam ýaqyt boıy ishki ister organdarynda qyzmet atqardy. Terekti aýdany Aqjaıyq aýylynda turatyn ıÝrııdiń alty balasy bar. Fedorov aýylynda turatyn nemerem Olegtiń jubaıy qazaq, esimi Samal. Bir nemerem Tanıa M.Ótemisov atyndaǵy Batys Qazaqstan ýnıversıtetinde oqıdy. Oǵan ázildep, «Qazaq jigitine turmysqa shyǵasyń ba?» desem, «Nesi bar, ıá» deıdi, buıyrǵany bolar. Bir nemerem ıÝra órt sóndirýshi, shekarashy bolýǵa nıettenip júr. Qalada páterimiz bolǵanymen, Aqjaıyq aýylyna jetkenshe asyǵyp turamyn.
Eń bastysy, beıbitshilikke jetetin eshteńe joq. Elimiz aman, jurtymyz tynysh bolsyn. Myna indetten tezirek qutylýǵa jazsyn halqymyzdy», dedi QazAqparat tilshisine Lev Dorofeev.
Eske sala keteıik, budan buryn kópirden sekirgen áıeldi qutqarǵan oraldyq áskerı qyzmetshiniń medalmen marapattalǵanyn, Baqyt Alazovtyń tártip pen tárbıe áskerı qyzmettiń qos qanaty ispettes ekendigi týraly aıtqanyn jazǵan bolatynbyz.
Sondaı-aq qatardaǵy jaýynger ulty ózbek bolǵanymen, júregi qazaq dep soǵatynyn jarııa etti.
