Máýlen Áshimbaev ýtılalym týraly pikir bildirdi

ASTANA. KAZINFORM – Senat tóraǵasy Máýlen Áshimbaev ýtılalymǵa qarsy petıtsııa týraly pikir bildirdi.

«Meniń bilýimshe, petıtsııaǵa 50 myń adam qol qoıǵan. Sondyqtan elimizdiń zańdary boıynsha ýákiletti organ qarap jatyr. Bul jaǵdaıda Ónerkásip jáne qurylys mınıstrligi petıtsııany qaraýǵa alǵanyn bilemin. Jumys toby qurylyp, oǵan qoǵam ókilderi de, múddeli toptar da kirdi. Osy jumys toby petıtsııada aıtylǵan talaptar men usynystardy qarastyrady. Osydan keıin mınıstrlik qandaı da bir ustanymyn ázirlep, qoǵam men depýtattarǵa jetkizedi», - dedi spıker. 

Máýlen Áshimbaev halyqtyń ýtılalymǵa qarsy petıtsııa bastaýyna ondaǵy aqshanyń ashyq ıgerilmeýi sebepker boldy dep esepteıtinin aıtty. 

«Bul jerdegi negizgi qorytyndy otandyq óndirýshilerdi qoldaý bolýy kerek shyǵar. Biraq sonymen birge halyq ondaǵy aqsha qalaı ıgerilip jatqanyn surap otyr. Bir nárse aıqyn. Qoǵam ondaǵy aqshanyń qalaı jumsalyp jatqany týraly aqparat tym az ekenin, qandaı kompanııalar qalaı ıgerip jatqanyn aıtyp otyr. Osy tusta máseleler bar sııaqty. Úlken ashyqtyq kerek. Itılalym qalaı ıgerilip jatqany týraly halyqqa aqparat kerek. Menińshe, másele osy jerden týyndap turǵan sııaqty», - dedi Máýlen Áshimbaev.