Máýlen Áshimbaev qazaqstandyqtardy Naýryz meıramymen quttyqtady

ASTANA. KAZINFORM – QR Parlamenti Senatynyń tóraǵasy Máýlen Áshimbaev qazaqstandyqtardy Naýryz meıramymen quttyqtady.

«Qurmetti dostar!

Barshańyzdy Ulystyń uly kúni – Naýryz meıramymen shyn júrekten quttyqtaımyn!

Naýryz – izgilik, tazalyq, janashyrlyq sııaqty mańyzdy qundylyqtardy dáripteıtin kóktem merekesi. Jańarý men jańǵyrýdyń bastaýy bolǵan bul meıram – bizdiń tól jańa jylymyz. Sondyqtan halqymyz ejelden osy kúnge erekshe mán berip, Áz-Naýryzdy jaqsylyqtyń, jarasymdylyqtyń jáne jasampazdyqtyń jarshysy retinde dáriptep keledi.

Prezıdentimiz Qasym-Jomart Kemeluly Toqaevtyń bastamasymen bıyl elimizde Naýryz meıramy jańasha atalyp ótip jatyr. Arnaıy Naýryznama onkúndigi jarııalanyp, kórisý, qaıyrymdylyq, mádenıet jáne salt-dástúr, shańyraq, ulttyq kıim, jańarý, ulttyq sport, yntymaq, jyl basy jáne tazarý sııaqty qoǵamdy uıystyrar qundylyqtarǵa basa mán berilýde.

Mundaı qadam ulttyq biregeılikti nyǵaıtý jáne merekeniń mańyzy men mazmunyn arttyrý jolynda aıryqsha mánge ıe. Aldaǵy ýaqytta bul bastama ıgi dástúrge aınalyp, halqymyzdyń tárbıe men taǵylymǵa taban tiregen ozyq oıly ult bolyp qalyptasýyna óz septigin tıgizedi dep senemin.

Barshańyzdy merekemen quttyqtaı otyryp, elimizge amandyq pen tynyshtyq, ár shańyraqqa shattyq pen baq-bereke tileımin!

Ulys oń bolsyn!»,-dep jazdy Senat tóraǵasy óziniń Facebook paraqshasynda.