Máýlen Áshimbaev «Alash pen Manas» atty shyǵarmashylyq keshke qatysty
Elordadaǵy Ulttyq akademııalyq kitaphanada Qazaqstannyń Eńbek sińirgen qaıratkeri, aqyn, jazýshy Baıanǵalı Álimjanovtyń «Alash pen Manas» atty shyǵarmashylyq keshi ótti. Іs-sharaǵa Senat tóraǵasy Máýlen Áshimbaev qatysty, dep habarlaıdy Kazinform.
Palata cpıkeri atalǵan ádebı kesh erekshe mádenı-rýhanı sıpatqa ıe ekenin aıtty. Sondaı-aq ol is-shara ǵasyrlarǵa jalǵasqan qazaq-qyrǵyz baýyrlastyǵynyń jarqyn kórinisi ekenin tilge tıek etti.
«Memleket basshysy Qasym-Jomart Kemeluly Toqaev Qyrǵyz Respýblıkasynyń elimiz úshin baýyrlas memleket ekenin únemi aıtyp keledi. Keıingi jyldary eki eldiń ózara qarym-qatynasy jańa bıikke kóterilip, jan-jaqty damyp jatyr. Onyń ishinde parlamentaralyq yntymaqtastyqtyń qarqynyn erekshe atap ótken jón. Ózara mádenı baılanystarymyzdyń da jóni bólek. Bul rette Súıinbaı men Arystanbek, Jambyl men Toqtaǵul, Kenen men Osmanquldyń qarym-qatynastary ortaq mádenı muramyzdyń jarqyn sımvoly ekeni anyq. Alash qaıratkerleriniń qatarynda qyrǵyz zııalylarynyń da bolǵany tarıhtan málim. Al, ádebıettiń qos alyby – Muhtar Áýezov pen Shyńǵys Aıtmatovtyń qarym-qatynasy barshamyz úshin zor maqtanysh. Osy oraıda «Manas» jyry da adamzatqa ortaq mádenı mura, túrki halyqtarynyń rýhanı qýatyn kórsetetin úzdik týyndy ekeni sózsiz», - dedi Máýlen Áshimbaev.
Sondaı-aq Senat tóraǵasy áıgili jyrdyń taralýyna, tanylýyna jáne Qazaqstan men Qyrǵyz eliniń mádenı yntymaqtastyǵynyń nyǵaıýyna Baıanǵalı Álimjanov úlken úles qosyp kele jatqanyn atap ótti. Máýlen Áshimbaev qalamgerdiń qazaqtyń ulttyq qundylyqtary men jyr ónerin damytýdaǵy róline de nazar aýdardy.
«Baıanǵalı Álimjanovtyń jyrshylyq talanty erekshe. Ol qazaqtyń «Qobylandy batyr», «Er Tarǵyn» sekildi jyrlaryn da keńinen nasıhattaýǵa zor úles qosty. Aǵamyz qazirgi tańda qazaqtan shyqqan birden-bir manasshy dep aýyz toltyryp aıta alamyz. Sondyqtan ol – qazaq pen qyrǵyzǵa birdeı syıly azamat. Osyndaı shyǵarmashylyq keshter mádenı qundylyqtardy saqtaýǵa jáne baýyrlas halyqtardyń mádenı baılanystaryn odan ári nyǵaıtýǵa úlken úles qosady», - degen Máýlen Áshimbaev jazýshyǵa shyǵarmashylyq tabys tiledi.
Óz sózinde Baıanǵalı Álimjanov «Manas» jyrynyń ulttyq mádenıetke tıgizgen zor yqpalyna toqtalyp, onyń jazylý tarıhy jáne qazaq tiline aýdarylýy týraly aıtty.
Іs-sharaǵa Parlament depýtattary Mádenıet jáne aqparat mınıstrliginiń basshylyǵy, Qyrǵyz Respýblıkasynyń Qazaqstandaǵy Elshisiniń keńesshisi Zaravshan Kýramaev, pýblıtsıst, memleket jáne qoǵam qaıratkeri Saýytbek Abdrahmanov, Qazaqstannyń halyq jazýshysy Tólen Ábdik, memleket jáne qoǵam qaıratkerleri Qýanysh Sultanov pen Darhan Myńbaı, fılologııa ǵylymynyń doktory, professor Serik Negımov, sondaı-aq zııaly qaýym ókilderi, qyrǵyz etnomádenı birlestiginiń músheleri, qoǵamdyq uıymdardyń ókilderi jáne taǵy basqalary qatysty.
