Máýlen Áshimbaev Túrikmenstan Prezıdenti Serdar Berdimuhamedovpen kezdesti
Іs-sharada sóz sóılegen Máýlen Áshimbaev Ortalyq Azııa memleketteri men Reseı arasyndaǵy dıplomatııalyq qatynastardyń ornaǵanyna 30 jyl tolýyna oraı ótip jatqan kezdesýdiń mańyzy zor ekenin atap ótti.
«Bizdiń elderimizdiń memleket basshylary túrli baǵyttar boıynsha yntymaqtastyqty odan ári nyǵaıtýǵa basa mán berip keledi. Osy jyldar ishinde elderimizdiń Táýelsizdigin ózara qurmetteýge, tatý kórshilikke jáne bir-birimizdi únemi qoldaýǵa negizdelgen memleketaralyq dıalogtyń ozyq úlgisi qalyptasty» , – dedi Senat Tóraǵasy.
Sonymen qatar Máýlen Áshimbaev álemde buryn-sońdy bolmaǵan geosaıası ahýal shıelenisip turǵan qazigi kezeńde parlamentaralyq yntymaqtastyqtyń mańyzdy ekenin aıtty. Bul oraıda Qazaqstannyń ustanymy ózgerissiz qalady. Ol qaýipsizdiktiń bólinbeıtindigine jáne halyqaralyq quqyq pen BUU Jarǵysynyń qaǵıdattary negizinde halyqaralyq problemalardy beıbit jolmen sheshýden basqa balama joq ekendigine taban tireıdi. Sondyqtan Qazaqstan kelissózder júrgizý protsesin ilgeriletý jónindegi kez kelgen bastamany qoldaıdy.
«Biz Ortalyq Azııanyń beıbitshilik, turaqtylyq jáne órkendeý óńiri bolyp qalýyna múddelimiz. Ókinishke qaraı, óńirde Aýǵanstandaǵy jaǵdaıǵa, esirtki trafıgine, shekara mańyndaǵy keleńsizdikterge, sý resýrstarynyń shekteýligine jáne ekologııaǵa baılanysty birqatar ózekti problema men syn-qaterler bar. Parlamentaralyq dıalog aıasynda osy jáne basqa da máselelerdi talqylap, olardy sheshý boıynsha ortaq konstrýktıvti tásilderdi qolǵa alýǵa múmkindik týady» , – dedi Máýlen Áshimbaev.
Senat Tóraǵasy sondaı-aq Forýmǵa qatysýshy áriptesterine Qazaqstanda júrgizilip jatqan reformalar týraly keńinen aıtyp berdi.
«Qazaqstanda qolǵa alynǵan konstıtýtsııalyq reforma memlekettik basqarý júıesiniń tıimdiligi men ashyqtyǵyn arttyrýǵa arnalǵan. Osyǵan oraı Konstıtýtsııanyń úshten birine túzetýler engizý jáne jyl sońyna deıin 20-dan astam zań qabyldaý kózdelip otyr. Al aldaǵy referendým árbir azamatqa konstıtýtsııalyq reformaǵa tikeleı qatysýǵa múmkindik berip, demokratııalandyrý jolyndaǵy baǵdarymyzdy nyǵaıta túsedi» , – dedi Senat Tóraǵasy.
Máýlen Áshimbaev jumys sapary barysynda Túrikmenstan Prezıdenti Serdar Berdimuhamedovpen kezdesti. Qazaqstan Parlamenti Senatynyń Spıkeri túrikmen kóshbasshysyna Qazaqstan Respýblıkasynyń Prezıdenti Qasym-Jomart Toqaevtyń jyly lebizin jetkizdi. Sondaı-aq kezdesýde eki eldiń parlamentaralyq ózara is-qımyl máseleleri áńgimege arqaý boldy.
Qazaqstan Senatynyń Tóraǵasy sondaı-aq Túrikmenstan Halk Maslahaty Mıllı Gengeshiniń Tóraǵasy Gýrbangýly Berdimuhamedovpen de kezdesti. Onda Parlament boıynsha Qazaqstan men Túrikmenstan arasyndaǵy ekijaqty yntymaqtastyqty nyǵaıtý jáne damytý basymdyqtary sóz boldy. Taraptar logıstıkalyq máselelerdi de qozǵady. Geosaıası shıelenister jaǵdaıynda temirjol, avtomobıl, sý kóligi salasyndaǵy birlesken jumystyń qarqynyn arttyrý jaıy da nazardan tys qalǵan joq.
«Biryńǵaı qolaıly tarıftik saıasat júrgizý «Qazaqstan – Túrikmenstan – Iran» jáne «Qazaqstan – Túrikmenstan – Aýǵanstan» baǵyttary boıynsha júk aǵynyn arttyrýǵa múmkindik beredi. Qazirgi tańda qalyptasqan geosaıası jaǵdaıǵa baılanysty bul – ózekti másele. Sondyqtan parlamentshiler osy jáne basqa da baǵyttar boıynsha týyndaǵan máselelerdi sheshýge járdemdesý úshin memlekettik organdarmen birlesip, belsendi jumys isteýge daıyn» , – dedi Máýlen Áshimbaev.
Kezdesýde parlamentaralyq ózara is-qımyl qazaq-túrikmen qatynasyndaǵy turaqtylyq faktorlarynyń biri ekeni aıtyldy. Máýlen Áshimbaev osyǵan baılanysty eki el arasyndaǵy yntymaqtastyqty tereńdetý, sondaı-aq, ekijaqty, óńirlik jáne halyqaralyq kún tártibindegi mańyzdy máselelerdi taǵy bir pysyqtaý úshin parlamenttik dıplomatııanyń áleýetin belsendi paıdalaný qajettigine de toqtaldy.
