Máýlen Áshimbaev: Mysyr ókilderi din mamandaryn daıarlaýǵa qoldaý kórsetedi
Senat tóraǵasy jazbasynda Mysyr eline sapary barysy týraly baıandaıdy.
«Taıaýda Prezıdentimizdiń tapsyrmasymen Mysyr eline resmı saparmen bardyq.
Qazaqstan úshin Mysyr arab jáne ıslam álemindegi mańyzdy seriktes memleketterdiń biri. Eki eldi baılanystyratyn ortaq qundylyqtar az emes. Sonyń ishindegi eń mańyzdysy ıslam dini ekeni sózsiz.
Islam ata-babamyzdyń dini. Keńes zamanynda bul baǵytta túrli qıyndyqtar men kedergiler bolǵany belgili. Tek Táýelsizdik alǵannan keıin ǵana asyl dinimizdi keńinen dáripteýge jol ashyldy. Osy rette bizder úshin ıslamtanýshy mamandar daıarlaý isinde Mysyr eliniń, onyń ishinde álemge áıgili ál-Azhar ýnıversıtetiniń kómegi erekshe boldy. Mysyrdyń qoldaýymen elimizde «Nur-Múbárak» Egıpet Islam ýnıversıteti ashyldy.
Qazirgi tańda ál-Azhar ýnıversıteti ıslamnyń sýnnıttik baǵytyn nasıhattaıtyn jáne kásibı din mamandaryn daıarlaıtyn dúnıe júzindegi eń iri oqý orny. H ǵasyrda negizi qalanǵan bilim ordasy búginde búkil ıslam álemi úshin aǵartýshy, ǵylymı jáne rýhanı ortalyq retinde asa mańyzdy.
Islam – ejelden beıbitshilik pen kelisimdi dáripteıtin din. Osy rette ál-Azhardyń dinı ekstremızmmen kúres jumystary da aıryqsha mánge ıe ekeni belgili. «Qańtar oqıǵasynan» keıin elimizde atalǵan máseleniń ózektiligi arta tústi. Sondyqtan bul salada osy ortalyqtyń tájirıbesine súıenýimiz qajet. Ál-Azhardyń Bas ımamy, sheıh Ahmed at-Taıebpen kezdesýde osy máselege arnaıy toqtaldyq»,-deıdi Máýlen Áshimbaev.
Sondaı-aq ol sózinde Sheıh maman daıarlaýda, ımamdardyń biliktiligin arttyrýda Qazaqstanǵa qoldaý kórsetýdi odan ári arttyratynyn jáne ekstremızm ıdeologııasymen kúreste bizdiń elge júıeli túrde kómektesetinin jetkizgenin aıtady. Aldaǵy ýaqytta bul baǵytta birlesip, nátıjeli jumys isteımiz dep senemiz.
Sheıh Ahmed at-Taıeb Qazaqstannyń Álemdik jáne dástúrli dinder lıderleriniń Sezin ótkizý bastamasyna qoldaý bildirip, onyń qazirgideı geosaıası jáne dinı kózqarastar shıelenisken kúrdeli kezeńde asa mańyzdy ról atqaratynyn aıtty. Kezdesýde Sheıhke Prezıdentimizdiń Sezge shaqyrý hatyn resmı túrde tapsyrdym.
Sonymen qatar ál-Azhar ýnıversıtetinde oqyp júrgen qazaqstandyq stýdenttermen de arnaıy kezdestim.
Islamnan bólek, Qazaqstan men Mysyrdy baılanystyratyn tarıhı tulǵalar bar. Solardyń ishinde Sultan Beıbarystyń esimi erekshe atalady. Zamanynda Mysyrdyń sultany bolǵan Beıbarys babamyz sol óńirdiń ósip-órkendeýine úlken eńbek sińirdi.
Búginde Kaır qalasynda Beıbarys sultan saldyrǵan meshit bar. Sapar aıasynda rýhanı ortalyqty zııarat etip, babamyzdyń rýhyna quran baǵyshtadyq. Bul meshit osy eldegi eń kórnekti ári tarıhı jádigerlerdiń biri. Qazaqstan 2007 jyly Mysyrmen meshitti qalpyna keltirý boıynsha úkimetaralyq kelisimge qol qoıdy. Soǵan sáıkes eki memleket te qarjy bólip, tıisti jumystar qolǵa alynǵan edi. Degenmen, túrli jaǵdaılarǵa baılanysty jumys biraz turalap qaldy.
Mysyrdyń Ýaqyftar mınıstri Muhammed Muhtar Jumamen kezdesýde osy jaǵdaıǵa nazar aýdaryp, qaıta qalpyna keltirý jumystaryna basymdyq berý máselesin qozǵadyq. Kezdesýde Mınıstr Mysyr tarapy bul jumysqa qosymsha 2 mıllıon AQSh dollaryn bóletinin aıtty jáne jobanyń aıaqtalýyn óz baqylaýynda ustaıtynyn jetkizdi. Kelesi jyly Beıbarys Sultannyń týǵanyna 800 jyl tolatynyn eskersek, bul qýanyshty jańalyq ekeni sózsiz.
Mysyr Parlamenti Senatynyń Tóraǵasy Ábdel Ýahab Ábdel Razekpen kezdesýimizde eki eldiń saýda-ekonomıkalyq, týrızm, mádenı-gýmanıtarlyq baılanystaryn arttyrý jáne parlamentaralyq yntymaqtastyqty nyǵaıtý máselelerine toqtaldyq. Osy eldiń Bas múftıi Ábdel Kárim Allammen kezdesýde de rýhanı jáne dinı baǵyttaǵy qatynastarǵa nazar aýdardyq.
«Aldaǵy ýaqytta bul sapar eki eldiń yntymaqtastyǵyn arttyrýǵa, parlamentaralyq qarym-qatynasty kúsheıtýge jáne dinaralyq dıalog pen dinı ekstremızmmen kúres salasynda birlesip áreket etýge óz septigin tıgizedi dep senemiz. Ol úshin Parlament Senaty elimizdiń Syrtqy ister mınıstrligimen jáne Qazaqstannyń Mysyrdaǵy Elshiligimen birlese otyryp, qajetti jumystardy ári qaraı jalǵastyra beredi»,-dedi Senat tóraǵasy.
