Maýıdegi órt saldarynan qaza tapqandar sany 53-ke jetti, júzdegen adam evakýatsııalandy
Bılik Gavaıı arhıpelagyndaǵy eń úlken araljardyń biri Maýıde áli de birneshe órt bolyp jatqandyqtan zardap shekkender sany artýy múmkin dep málimdedi.
Polıtsııa adamdardy «qaýipsizdik maqsatynda» Lahaına qalasynan alys bolýǵa shaqyryp, turǵyndardyń úılerine oralýy úshin barlyq sharalar qabyldanatynyn aıtty.
Araldyń batys bóligindegi adamdar Maýıdiń Kahýlýı áýejaıyna evakýatsııalandy. Maýı sheneýnikteri reısterin kútken 1400 adam áýejaıda túnegenin aıtty.
Prezıdent Baıden ákimshiligi beısenbide Gavaııdegi órtti «úlken apat» dep jarııalady. Órtpen kúresýge federaldy qarajat bólinedi.
Jaǵalaý kúzeti beısenbide órtten qashyp, muhıt sýyna sekirgen 17 adamdy qutqarǵanyn aıtty. Sýda joǵalyp ketkender týraly habarlamalar bolǵan joq.
Maýı aralyndaǵy 16 jol áli jabyq.
Jalynmen kúreste Ulttyq ulannyń eki tikushaǵy jumyldyrylǵan. Odan 100 myńnan astam gallon sý tógilidi. Tikushaqtar sársenbide 58 ret ushty.
Hawaiian Electric málimetinshe, beısenbi kúni tústen keıingi jaǵdaı boıynsha, aralda shamamen 12 400 adam elektr qýatynsyz qaldy.
Aralda túsirilgen jan túrshigerlik kadrlardan seısenbi kúni keshke tez taralǵan jalynnyń úılerdi birinen soń biri qıratyp jatqanyn kórýge bolady. Turǵyndar qashyp aman qalýǵa tyrysyp júr.
Maýıdegi orman órtinen keıin qalanyń bir kezderi bos emes kóshelerinde órtengen kólikter men buryn tarıhı ǵımarattar turǵan jerde kúl úıindileri qaldy.
Buǵan deıin sheneýnikter 271 qurylym jartylaı búlingen nemese qıraǵan, ondaǵan adam jaraqat alǵan dep málimdedi.
Sársenbide órt sóndirýshiler Maýı aralyndaǵy birneshe jerde órtti sóndirýdi jalǵastyrdy.
Buǵan deıin habarlaǵanymyzdaı, Gavaıı men Maýı aralyn sharpyǵan buryn-sońdy bolmaǵan orman órtinen kem degende 6 adam qaza tapty.