Máslıhat depýtattarynyń biliktiligi qalaı artady

ASTANA. KAZINFORM – Májilis depýtaty, «AMANAT» partııasy fraktsııasynyń jetekshisi Elnur Beısenbaev máslıhat depýtattarynyń biliktiligi qalaı artatynyn túsindirdi. 

«Meniń oıymsha, Memlekettik qyzmet agenttigine jańashyl úlken jumystardy jasaý kerek bolady. Árbir saıası partııa óz máslıhat depýtatynyń bilikti bolǵany úshin qyzmet jasaýy kerek. Mynany túsýinýimiz kerek: adam bilip týmaıdy, adam qalyptasady. Sonymen qatar álem ózgerip otyrady, bilim de, biliktilik te ózgeredi. Biz egerde máslıhat depýtattarynyń biliktiligin jyl saıyn, jarty jylda arttyrmasaq, olar tasada qalady. Sol sebepti oǵan mindetti túrde atsalysý kerek», - dedi ol máslıhat depýtattarynyń ІІ respýblıkalyq forým kýlýarynda. 

Sonymen birge spıker ártúrli forým, trenıng, kezdesý jáne jańa bilim modýldaryn uıymdastyrý keregin aıtty. 

«Basqa elderdegi mýnıtsıpaldy depýtattarmen baılanys ornatyp, álemniń ozyq tájirıbesin kórý kerek. Keı óńirlerdiń depýtattary sheshilmeı turǵan túıindi sapaly sheship jatatyn tustary bolady, sol máslıhataralyq baılanystyń da jetispeýi baıqalady. Oǵan da basymdyq berý kerek», - dedi Elnur Beısenbaev. 

Aıta keteıik, Prezıdent máslıhat depýtattarynyń biliktiligin arttyrýdy tapsyrǵan edi.