Máskeýlikterge qazaq tilin úıretetin jańa joba ashyldy
Qos qyzdy qazaq tiliniń áýezdigi baýrap alǵany sonshalyq, tildi úırenýdi qolǵa alypty. Jańa jobada týǵan qalasy men halqy jaıly qazaqsha áńgimeleıdi. Osydan birneshe jyl buryn eki máskeýlik qyzdyń qazaqsha án aıtqan beınejazbasy áleýmettik jeliniń birinde paıda bolyp, artynsha halyq arasynda keńinen tarap ketip edi ǵoı. Keıin álgi eki qyz endi týǵan qalasy men ondaǵy turǵyndar týraly qazaqsha baıandaýdy qolǵa alady. Til ýnıversıtetin bitirgen boıjetkender qazir PR salasynda jumys istegenmen, bos ýaqyttaryn sol jobaǵa arnap keledi.
«Biz bul jobany qazaq tilinde ózimizdiń de ózgelerdiń de kóńilin kóteretin, jaqsy is bolsyn dep qolǵa aldyq. Jáne úırenip jatqan tilimizdi umytyp qalmaıyq degen oımen bastadyq. Shynynda ózimizge tán ári el kóńilinen shyqqan joba boldy. Qazir qazaq tilin úırenip jatyrmyn jáne men jıi qate jasaımyn. Biraq meniń oıymsha, ár shet tildi úırengende qoryqpaý kerek»,- «Moskva qazaqsha» jobasynyń avtory Anastasııa Reshetnıkova.
«Eń bastysy, qolǵa alǵan isimiz kópshilikke unady. Óz basym «maǵan qarańyzdar men qazaqsha bilemin» dep dabyra etýdi, upaı jınaýdy nemese ózimdi jarnamalaýdy kózdegen joqpyn. Biz muny shyn júrekten ári ózimizge unaǵan soń jasadyq», dedi atalǵan jobanyń taǵy bir avtory Elızaveta Osıpova.
Ýaqyt óte qos qyz beıneblogty túrli formatta júrgize bastady. Pandemııa jarııalanyp, uzaq ýaqyt oqshaýlaý kezinde «karantındik qazaq tili» aıdaryn ashty. Máskeýdegi qazaqtardan suhbat alyp, jurtqa usyndy.
«Suhbat jazyp, sony jobanyń bir bóligi retinde usynsaq degen oı keldi. Alǵashqy suhbatty «Hor Týretskogo» ánshisi Alıbek Almadıevten aldyq. Sodan keıin osy jumysty jalǵastyrýdy sheship, Gúlnaz Balpeısovamen kezdestik. Imanbek, Aısultan Seıtov jáne Skrıptonıtpen suhbattarymyz óte qyzyqty bolyp shyqty»,- dep tolyqtyrdy Anastasııa Reshetnıkova.
Nastıa men Lıza qaza tilin alǵash ret ýnıversıtette estigen. Qazaqstan týraly da az bilgen. Biraq alǵashqy eki aıdyń ishinde qaza tilin turmystyq deńgeıde sóılese alatyndaı dárejege jetedi. Al 4 jylda tildik ortada bolmaı-aq óz oılaryn erkin jetkizip sóıleı alatyn boldy.
