Máskeýde oqyp júrgen QR azamattary japa shekken joq - Saıasat Nurbek
ASTANA. KAZINFORM - Máskeýdegi terakt kezinde onda oqyp júrgen qazaqstandyq azamattar japa shekken joq, dep habarlaıdy QR Ǵylym jáne joǵary bilim mınıstri Saıasat Nurbek.
"22 naýryzda Máskeý oblysyndaǵy Crocus City Hall kontsert zalynda terakt boldy.
Reseı Federatsııasynda «Bolashaq» jáne «500 ǵalym» baǵdarlamasy boıynsha búginde 32 qazaqstandyq azamat bilim alýda, 24 stıpendıat Máskeýde.
Olardyń eshqaısysy zardap shekken joq. Barlyq stıpendıattar baılanysqa shyqty", - dep jazdy mınıstr Telegram arnasynda.
Buǵan deıin habarlanǵandaı, belgisiz bireýler Máskeý túbindegi Krasnogorsk qalasyndaǵy Krokýs sıtı holl ǵımaratynda oq jaýdyrǵan.
Kýágerlerdiń aıtýynsha, qylmyskerler keshki saǵat 20:30 shamasynda, kontsert bastalar aldynda negizgi podezd arqyly ǵımaratqa kirip, kelýshiler men kúzetshilerge birden oq atqan. Sodan úsh-tórt adam kontsert zalyna kirip, kórermenderdi atyp, «Molotov kokteılderin» laqtyra bastaǵan. Osydan keıin shabýyl jasaǵandar qashyp ketken.
Reseıdiń Densaýlyq saqtaý mınıstrligi lańkestik áreketten zardap shekken 145 adamnyń birazynyń tizimin jarııalady.
Qaıǵyly oqıǵaǵa baılanysty Qazaqstan azamattary úshin myna senim telefony boıynsha jedel jeli iske qosyldy: 8 (925) 897-71-14.
QR Syrtqy ister mınıstrligi habarlaǵandaı, Reseıdegi teraktide qaza tapqandar men zardap shekkender arasynda qazaqstandyqtar bar ekeni týraly aqparat joq.
