Máskeýde Qazaqstan men Reseıdiń Syrtqy ister mınıstrleri kezdesti

MÁSKEÝ. QazAqparat - Qazaqstan Respýblıkasy Premer-Mınıstriniń orynbasary - Syrtqy ister mınıstri Muhtar Tileýberdi Máskeýge jumys saparymen kelip, onyń barysynda Reseı Federatsııasynyń Syrtqy ister mınıstri Sergeı Lavrovpen shaǵyn jáne keńeıtilgen quramda kelissózder ótkizdi.

QR Syrtqy ister mınıstrligi baspasóz qyzmetiniń habarlaýynsha, taraptar saıası, saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń jaı-kúıi men perspektıvalaryn talqylady. Kún tártibindegi halyqaralyq máselelerdiń keń aýqymy boıynsha pikir almasyldy.

Óńiraralyq jáne shekara mańy yntymaqtastyǵyn nyǵaıtý, otyn-energetıka jáne ǵarysh salalaryndaǵy ózara is-qımyl jónindegi praktıkalyq qadamdarǵa erekshe nazar aýdaryldy.

Sonymen qatar, syrtqy saıası vedomstvolardyń basshylary TMD, EAEO, UQShU, ShYU, AÓSShK jáne BUU ıntegratsııalyq birlestikteri sheńberindegi yntymaqtastyq, Ortalyq Azııadaǵy turaqtylyq pen qaýipsizdikti qamtamasyz etý máselelerin qarastyrdy.

Kezdesý qorytyndysy boıynsha dıplomatııalyq qatynastardyń ornaǵanyna 30 jyl tolýyn merekeleý jónindegi is-sharalar josparyna qol qoıyldy.