Máskeýde qazaq tili olımpıadasynyń jeńimpazdary marapattaldy
Aqtyq synǵa shyqqandardyń qatarynda Mońǵolııa, Máskeý jáne Reseıdiń túkpir-túkpirinde turyp jatqan qazaq dıasporasynyń ókilderi, qazaq tilin úırenip júrgen reseılikter qatysty.
Shara «Rýhanı jańǵyrý» baǵdarlamasy men Qazaqstan respýblıkasy men Reseı Federatsııasynyń arasynda dıplomatııalyq qarym-qatynastyń ornaǵanyna 25 jyl tolýy aıasynda ótti.
Olımpıadany Reseı óńirlerindegi qazaq ulttyq-mádenı birlestikteriniń, sondaı-aq QR ulttyq kitaphanasy men QR Mádenıet jáne sport mınıstrliginiń Tilderdi damytý jáne qoǵamdyq saıası jumystar komıtetiniń qoldaýymen RF-daǵy QR elshiligi men konsýldyq uıymdar uıymdastyrdy.
Eske sala keteıik, irikteý kezeńinde Máskeý, Sankt-Peterbýrg, Astrahan, Omby, Qazan syndy QR konsýldyq okrýgterinde tóreshiler shyn myqtylardy anyqtaǵan bolatyn.
Fınalda aýyzsha, jazbasha jáne shyǵarmashylyq baıqaýlardyń qorytyndysy boıynsha RF-daǵy QR Elshiliginiń dıplomattary, MMÝ lıngvısteri men qazaq tiliniń muǵalimderi, Máskeýdegi qazaq dıasporasynyń ókilderinen quralǵan qazylar alqasy jeńimpazdardy anyqtady.
Osylaısha birinshi oryndy qazaq dıasporasy jáne qazaq tili ana tili bolyp tabylatyn qatysýshylardyń ishinen Aıtolqyn Úrkel (Mońǵolııa) jeńip aldy. Ekinshi oryndy máskeýlik Janna Nursaparova ıelendi. Úshinshi orynda - Jámılıa Hodjanova (Máskeý).
Reseılik qatysýshylar ishinen birinshi oryndy Arına Babkova men Marııa Semına jeńip aldy. Ekinshi oryndy Ksenııa Medıankına men Tatıana Semenova ıelendi. Aleksandr Goja men Seda Sargsıan - úshinshi orynda.
Shyǵarmashylyq konkýrsta Túmennen Máskeýge osy olımpıadaǵa qatysý úshin arnaıy kelgen 15 jasar Azıza Aýǵalıeva jeńiske jetti. Ekinshi orynda - Seda Sargsıan, Tatıana Semenova - úshinshi.
Qazylar alqasy, sondaı-aq, saıystyń eń jas qatysýshylaryn da elep-eskere ketti: Árıdash Naýkenova (Máskeý), Aıdyn Jeksembaı (Máskeý), Ádilet Ýsenov (Norılsk). 
