Máskeýde Qańtar oqıǵasy týraly derekti fılm kórsetildi
ASTANA. KAZINFORM – Máskeýde Halyq sharýashylyǵynyń jetistikteri kórmesindegi «Qazaqstan» pavılonynda «Qańtar. Memlekettik tóńkeris áreketi» derekti fılminiń kórsetilimi ótti.
Sharaǵa memlekettik organdardyń, halyqaralyq jáne qoǵamdyq uıymdardyń, ǵylymı jáne saraptamalyq qoǵamdastyqtyń ókilderi, Máskeýdegi qazaq dıasporasynyń músheleri qatysty.
«2022 jylǵy qańtardaǵy qaıǵyly oqıǵalar Qazaqstannyń jańa tarıhynyń shejiresinde aıryqsha oryn aldy. Olardyń saıası protses vektory men dınamıkasyna áser etý aýqymyn asyra baǵalaý qıyn. Qańtar elimizdegi ózgeristerdiń katalızatory boldy. Sondyqtan sol kúnderdegi oqıǵalardy obektıvti, beıtarap jáne birjaqtylyqtan ada túsiný úlken mańyzǵa ıe», - dedi Qazaqstannyń Reseıdegi elshisi Dáýren Abaev fılm tanystyrylymynda.
Elshi bul fılmdi Reseıde, sarapshylar men jalpy jurtshylyǵy osy taqyrypqa qyzyǵýshylyq tanytatyn elde kórsetý mańyzdy ekenin atap ótti.
Jazýshy, «Kórkem ádebıet» baspasynyń bas redaktory Georgıı Prıahın fılmde jáne tutastaı alǵanda Qazaqstan basshylyǵynyń sheshimderinde adaldyq pen ashyqtyqty kórgenin aıtty.
«Maǵan bárinen buryn Qazaqstan Prezıdenti Qasym-Jomart Toqaevtyń el halqymen qarym-qatynasyndaǵy shynshyldyǵy unady. Qazir munyń jańa generatsııa jáne qarapaıym adamǵa degen jańa qarym-qatynas ekeni belgili», - dep atap ótti jazýshy.
Onyń aıtýynsha, respýblıka basshylyǵynyń búgingi saıasaty óz halqyna qyzmet etýge baǵyttalǵan.
«Bul fılmde maǵan raqymshylyq týraly epızod unady. Mundaı áreketti tek kúshti adam jáne halyqtyń úlken qoldaýyn sezinetin basshy ǵana jasaı alady», - dep túıindedi Georgıı Prıahın.
«Joǵary ekonomıka mektebi» ǴZÝ azamattyq qoǵamdy zertteý ortalyǵynyń bas sarapshysy Vıacheslav Ivanovtyń aıtýynsha, fılm sol oqıǵalardy jarııalaýdaǵy mańyzdy kezeń bolyp sanalady.
«Rejısserler barynsha tyrysqan, olar oqıǵalar hronologııasyn týra, aıqyn túrde kórsetti. Bul bizdi sol oqıǵalarǵa aparatyn naǵyz derekti fılm. Onda analıtıkalyq aqparat bar jáne osy qaıǵyly oqıǵanyń qaıdan bastalǵanyn baıandady, fılm bolyp jatqan protsesterdiń evolıýtsııasyn jáne olardyń saldaryn kórsetedi», — dedi sarapshy.
Sarapshy Qazaqstan halqy bastan keshken bul oqıǵalar Reseı úshin de aýyr bolǵanyn jetkizdi.
«Bul fılmdi kórgende el basshylyǵy men UQShU boıynsha áriptes elderdiń naqty reaktsııasy bolmaǵanda, Qazaqstan Respýblıkasynyń qandaı syn-qater aldynda turǵanyn jáne qaıǵyly jaǵdaıdyń aýqymy qandaı bolýy múmkin ekenin túsinýge bolady», — dedi RǴA álemdik ekonomıka jáne halyqaralyq qatynastar ınstıtýty dırektorynyń mindetin atqarýshy Sergeı Afontsev.
S. Afontsevtiń aıtýynsha, fılmde bıliktiń naqty aımaqtardaǵy ekonomıkalyq talaptardy sheshýge degen talpynysynda adamdarǵa ne qajet ekenine nazar aýdaryldy jáne tolyqqandy syndarly bolǵany aıqyn kórsetilgen.
«Biraq odan keıin adamdardyń múddesi qyzyqtyrmaıtyn, óz múddeleri men qojaıyndarynyń suranystaryna ózgerister engizýdi qalaıtyn kúshter kiristi. Men Qazaqstan basshylyǵy men UQShU elderi basshylyǵynyń kúsh-jigeri arqyly osy jaǵdaıdyń órshýine jol bermegenimizge qýanyshtymyn», - dedi ol.
