Máskeýde Baqyt Qaıyrbekovtiń shyǵarmashylyq keshi ótti

ASTANA. QazAqparat - Máskeý qalasyndaǵy "Ulttar" úıinde belgili aqyn, Sh.Aımanov atyndaǵy "Qazaqfılm" kınostýdııasynyń prezıdenti Baqyt Qaıyrbekovtiń shyǵarmashylyq keshi ótti, dep habarlaıdy «QazAqparat» HAA Qazaqstannyń Reseıdegi elshiliginiń saıtyna silteme jasap.

Saltanatty jıyn kezinde qalamgerdiń "Kóp núkte" atty jańa kitaby kópshilikke tanystyrylyp, "Naýryz" meıramy jaıly derekti fılmi kórsetildi.

Aqyn, aýdarmashy, rejısser - Baqyt Qaıyrbekov 65 jasta. Ol óziniń mereıtoıyn buǵan deıin Almatyda ótkizse, endi mine Máskeý jurtshylyǵymen qaýyshyp otyr. Reseı astanasyndaǵy 2 birdeı joǵary oqý ornyn támamdaǵan qazaq aqyny, osylaısha kórshi eldegi oqyrmandaryna da shyǵarmashylyq esep berdi.

Saltanatty kesh barysynda Baqyt Qaıyrbekov óziniń óleńderin oqyp, derekti fılmderin kópshilikke kórsetti. Poezııada jáne kınematografııa salasynda da ózindik qoltańbasy bar qalamgerdiń kez kelgen eńbeginde, qazaqtyń ıisi, ulttyń úni jatyr.

Shyǵarmashylyq keshke Baqyt Qaıyrbekovtiń qalamdas dostary men ádebıetshiler, zııaly qaýym ókilderi men qazaq dıplomattary jáne Máskeýde turatyn qandastarymyz molynan jıyldy. Osylaısha, qazaqtyń ádebıeti men mádenıeti alyp shahardaǵy san alýan jurttyń basyn qosty.

«Kórisý, Amal degen keremet kúnimiz bar, sonymen quttyqtaımyn! Kórisý degen qandaı keremet - qystan shyqtyq, aman qaldyq. Óleń sııaqty ózimizdiń taǵdyrymyzdy, ómirimizdi bilý kerek, túsiný kerek, maǵynasyn kóterý kerek»,-dedi kesh barysynda  Baqyt Qaıyrbekov.

Eýrazııalyq televıdenıe jáne radıo akademııasynyń prezıdenti Valerıı Rýzınniń aıtýynsha, Baqyt Qaıyrbekov - klassık aqyn. «Ol qazaq mádenıetiniń keńistigin keńeıtýge atsalysyp, óziniń aqyndyq jáne kıno shyǵarmashylyǵynda keremet dúnıeler jasap júr. Onyń týyndylarynan qazaq dástúri men mádenıetin mahabbatpen, tereń bilimmen kórsetkeni baıqaımyz».