Máskeýde Álıhan Bókeıhanǵa bıýst ornatyldy
MÁSKEÝ. KAZINFORM – Máskeýdegi Halyq sharýashylyǵy jetistikteri kórmesindegi (HShJK) qazaqstandyq pavılonda qazaq halqynyń kórnekti qoǵam jáne memleket qaıratkeri Álıhan Bókeıhannyń 160 jyldyǵyna oraı onyń bıýsti ornatyldy, dep habarlaıdy agenttik tilshisi.
– Álıhan Bókeıhan Reseı ımperııasy Memlekettik Dýmasynyń jumysyna qatysa otyryp, qazaq pen basqa da baıyrǵy halyqtardyń múddelerin qorǵady. Ol kópultty birlik pen progreske sendi jáne onyń murasy búgingi kúnde elderimiz arasyndaǵy strategııalyq áriptestik qaǵıdattarynda kórinis taýyp otyr, – dep atap ótip Qazaqstannyń Reseıdegi Elshisi Dáýren Abaev.
Elshi bıýstti ornatýdyń bastamashysy qazaqstandyq kásipker Janbolat Nadyrovqa jáne barlyq osy ıgi iske úles qosqandarǵa alǵysyn bildirdi. Ol bul oqıǵany halyqtarymyzdyń ortaq tarıhyna qosqan úlesine qurmet dep atady.
– Álıhan Bókeıhan urpaq úshin ómiri men qyzmeti úlgi bola alatyn halqymyzdyń kórnekti ókili, mundaı adamdarǵa eskertkishter ornatý qajet dep sanaımyn. Endi Máskeýge kelýshi qazaqstandyq qonaqtar HShJK-ǵa baryp, ataqty jerlesimizge óz qurmetterin bildire alady, – dep atap ótti Janbolat Nadyrov.
Óz kezeginde HShJK qazaqstandyq pavılonynyń basshysy Tamara Babakova kásipkerdiń sózderin qoldap, pavılonǵa kelýshilerdiń kóp ekenin atap ótti.
– Álıhan Bókeıhannyń bıýsti ótken, qazirgi jáne bolashaq kezeń arasyndaǵy baılanystyń sımvolyna aınalady, – dedi ol.
Іs-sharanyń qadirli qonaǵy, Álıhan Bókeıhannyń nemere inisi, professor Nurym Bókeıhanov ataqty týysynyń ómiri úzilmegende, onyń qazaq halqy úshin bereri kóp bolǵanyn ókinishpen atap ótti.
– Onyń bastamasymen Abaıdyń barlyq óleńi jınaqtaldy. Ol tuńǵysh abaıtanýshy boldy, kórnekti aqyn men fılosoftyń murasyn halyqqa jetkizdi, – dedi Nurym Bókeıhanov.
Aıta keteıik, 1920-1930 jyldary Álıhan Bókeıhan Máskeýde turyp, ǵylymı jáne ádebı qyzmetpen aınalysqan. 1937 jyly ol qýǵyn-súrginge ushyrap, atyldy, 1989 jyly qylmys quramynyń joq bolýyna baılanysty aqtaldy. Álıhan Bókeıhan Máskeýdegi Don qorymynda ortaq qabirde jerlengen.
Buǵan deıin Álıhan Bókeıhannyń 160 jyldyǵyn atap ótý sharalary aıasynda onyń murasy qalaı zerttelip jatqanyn jazǵanbyz.