Maskatta AQSh pen Iran kelissózi bastaldy
ASTANA.KAZINFORM - Aımaq qaýipsizdigine tóngen qaýip-qaterlerdiń artýyna baılanysty Iran men AQSh arasyndaǵy dıplomatııalyq kelisim boıynsha jumystar áli júrip jatyr, dep habarlaıdy Kazinform agenttigi.
Oman astanasy Maskatta AQSh pen Iran ókilderi arasyndaǵy janama kelissózder bastaldy. Iran delegatsııasyn Syrtqy ister mınıstri Abbas Aragchı, al AQSh delegatsııasyn Taıaý Shyǵys jónindegi prezıdenttiń arnaıy elshisi Stıv Ýıtkoff basqarady.
AQSh prezıdentiniń keńesshisi Djared Kýshner de konsýltatsııalarǵa qatysýdy josparlap otyr. Kelissózderge Oman deldaldyq etedi.
Vashıngton Irannyń ıadrolyq baǵdarlamasy boıynsha dıplomatııaǵa oralýǵa daıyn ekenin málimdedi, biraq kelissózder kún tártibin ballıstıkalyq zymyrandar, Tegerannyń aımaqtyq saıasaty jáne adam quqyqtary jaǵdaıyn talqylaýdy qamtıtyndaı keńeıtýdi talap etti. Iran bıligi óz tarapynan tek ıadrolyq máseleni talqylaýǵa daıyn ekenin atap ótti.
— Iran dıplomatııaǵa sergek ári ótken jylǵy oqıǵalardy nazarda ustaı otyryp kirisip jatyr. Biz adal nıetpen áreket etemiz jáne óz quqyqtarymyzdy berik qorǵaımyz. Mindettemeler oryndalýy kerek, - dedi Abbas Aragchı.
Tegeran zymyran baǵdarlamasyn birneshe ret «qyzyl syzyq» dep atap, qorǵanys múmkindikteri boıynsha kez kelgen kelissózderdi joqqa shyǵardy. Bir kún buryn Irannyń memlekettik televızııasy Islam revolıýtsııalyq gvardııa korpýsynyń jerasty nysandaryna uzaq qashyqtyqqa ushatyn ballıstıkalyq zymyrandardyń biri - Horramshahr-4 ornalastyrylǵanyn habarlady.
Sonymen qatar, halyqaralyq BAQ-qa silteme jasaǵan derekkózderge sáıkes, Iran ýrandy baıytý máseleleri boıynsha óz ustanymynyń sheginde jumsaqtyq tanytyp otyr.
Kelissózder Tegeran men Vashıngton arasyndaǵy shıelenis jaǵdaıynda ótip jatyr. Ótken maýsymda AQSh Irannyń ıadrolyq nysandaryna shabýyl jasap, Izraıldiń 12 kúndik naýqanynyń sońǵy kezeńine qosyldy. Keıinnen Iran ýrandy baıytýdy ýaqytsha toqtatqanyn jarııalady.
AQSh prezıdenti Donald Tramp buǵan deıin dıplomatııa sátsiz bolǵan jaǵdaıda Vashıngtonnyń basqa nusqalary bar ekenin eskertken bolatyn. Iran óz kezeginde kez kelgen áskerı shabýylǵa qatal jaýap berýge daıyn ekenin málimdedi jáne AQSh áskerı bazalaryn ornalastyratyn aımaqtyq elder úshin qaýipterdi atap ótti.
Osyǵan deıin Iran men AQSh kelissózi Oman astanasynda ótetinin jarııalaǵan edik.