Máshhúr Júsip Kópeevtiń 165 jyldyq mereıtoıy ótti
Máshhúr Júsip Kópeevtiń 2006 jyly salynǵan kesene kesheninde namaz oqylǵannan keıin merekelik is-sharalar bastaldy. Merekege oblys ákimi Asaıyn Baıhanov, QR Parlamenti Májilisiniń tóraǵasy Erlan Qoshanov, zııaly qaýym ókilderi jáne óńirdiń ǵylymı qoǵamdastyǵy qatysty.
Erlan Qoshanov Memleket basshysynyń quttyqtaý hatyn oqyp, izgi tilegin jetkizdi.
Toraıǵyrov ýnıversıteti «Máshhúr joly» aýdıokitabynyń, Máshhúr Júsip Kópeevtiń 10 tomdyq «Tańdamaly shyǵarmalar jınaǵy» atty aýdıokitabynyń tusaýkeserin, sondaı-aq máshhúrtanýshylardyń kezdesýin ótkizdi. Bul is-sharada Mádenıet jáne sport mınıstri Ashat Oralov, Aqparat jáne qoǵamdyq damý mınıstri Darhan Qydyráli, Parlament Senatynyń depýtaty Altynbek Nuhuly, sondaı-aq Máshhúr Júsiptiń urpaqtary baıandama jasady. ToU rektory Erkin Sadyqov quttyqtaý sóz sóıledi.
«Búgin biz Máshhúr Júsipti kórnekti oıshyl, ustaz jáne qoǵam qaıratkeri retinde eske alamyz. Ol naǵyz patrıot retinde árqashan óz Otanyna, halqyna paıda ákelýge daıyn boldy. Ol óziniń bar ǵumyryn zertteý men tanymǵa arnady, bilimdi jetildirýge qumar boldy jáne qoǵamdy aǵartýshylyqqa baǵyttady. Máshhúr Júsiptiń murasy týraly aıtatyn bolsaq, onyń bilim men mádenıetke qosqan úlesi orasan zor. Baba murasyn urpaǵy jalǵastyryp, búginde kóp eńbek jasalyp jatyr», - dedi rektor.
Osyndaı ataýly kúndi merekeleý aıasynda báıge men kókpardan sporttyq oıyndar, qazaqsha kúresten jarystar, sondaı-aq jyrshy, termeshi jáne aıtyskerler arasynda respýblıkalyq baıqaý ótti.
Sonymen qatar Ózbekstan men Qyrǵyzstannan kelgen qolónershilerdiń qatysýymen Halyqaralyq Orta Azııa jármeńkesi, sýretshiler kórmesi jáne sporttyq jarystardyń jeńimpazdaryn marapattaý rásimi ótti.
