Qazaqstan men AQSh ǵalymdary agrarlyq sektor men sý resýrstaryndaǵy máseleni sheshpek
ASTANA. KAZINFORM – Qozybaev ýnıversıteti men Arızona ýnıversıtetiniń ǵalymdary ırrıgatsııa tehnologııasy boıynsha ǵylymı zertteýler júrgizedi. Bul týraly QR Ǵylym jáne joǵary bilim mınıstrliginiń baspasóz qyzmeti málim etti.
«Qazaqstanda azyq-túlik daqyldaryn ósirý úshin paıdalanylatyn sýarmaly sýdyń mıkrobıologııalyq sapasyn anyqtaýǵa arnalǵan tehnıkalyq quraldar» jobasy boıynsha birlesken ǵylymı zertteýler AQSh-tyń granttyq jobasy aıasynda júrgizilip otyr.
Arızona ýnıversıtetiniń vıtse-prezıdenti Sheın Berdjesstiń Qozybaev ýnıversıtetine sapary barysynda oblys ákimi Ǵaýez Nurmuhambetovpen kezdesip, joǵary bilim berý jáne agrarlyq ǵylymdy damytý salasyndaǵy seriktestiktiń negizgi máseleleri talqylandy. Arızona ýnıversıtetiniń aýyl sharýashylyǵy, bıologııa ǵylymdary jáne qorshaǵan orta kolledji taǵamdyq aýrýlardyń taralý qaýpin azaıtý maqsatynda sýarmaly sýynyń mıkrobıologııalyq sapasyn basqarý sheshimderin ázirleý boıynsha 30 jyldyq zertteý tájirıbesine ıe.
Klımattyń ózgerýine baılanysty aımaqtyń gıdrologııalyq rejımderindegi ózgeristerdiń kúsheıýi azyq-túlik qaýipsizdigine qatysty alańdaýshylyq týǵyzady. Qazaqstan Respýblıkasy – aýylsharýashylyq ónimderin negizgi óndirýshi jáne eksporttaýshy. Jaqynda elimizdiń soltústik bóligindegi ormandy dala bıomynda egindi sýarý bastaldy. Jobanyń zertteý toby SQO fermerleri paıdalanatyn sýarmaly sýdyń sapasyn baǵalaıdy, ári qaraı sýarmaly sýlardaǵy taǵamdyq patogendik mıkroorganızmdermen baılanysty táýekelderdi baqylaý úshin aýyl sharýashylyǵy taýaryn óndirýshilerge arnalǵan nusqaýlyq qujattar men tsıfrlyq quraldy ázirleıdi.
Bul sýarý sýynyń mıkrobıologııalyq sapasyn «basqarýǵa» múmkindik beredi, ıaǵnı aımaq úshin jáne eksportqa qaýipsiz kókónister men jemshóp alynady. Arızona ýnıversıteti delegatsııasynyń sapary barysynda QR úsh oblysynyń úsh JOO ǵalymdarynyń konsortsıýmyn ashý týraly aldyn ala kelisimge qol jetkizildi.
Birlesken ǵylymı zertteýler soltústik aımaqtardyń sý resýrstary, ırrıgatsııa, azyq-túlik qaýipsizdigi, jerdiń tozýy, aýyl sharýashylyǵy daqyldary men mal sharýashylyǵynyń sapasyn arttyrý máselelerin sheshýge baǵyttalady. Delegatsııa ókilderiniń aıtýynsha, munyń barlyǵy aımaqtardyń agroónerkásip keshenderiniń damýyna tyń serpin beredi.
