Masanchıde qıraǵan úıindilerdiń astynan adam múrdesi tabyldy

NUR-SULTAN. QazAqparat – Qordaı aýdanyna qarasty Masanchı aýylynda qıraǵan úıindilerdiń astynan adam múrdesi tabyldy. Bul jaıynda Jambyl oblysy ákiminiń keńesshisi Qanat Qulshymanov Facebook paraqshasynda jazdy, dep habarlaıdy QazAqparat tilshisi.

«2020 jyldyń 11 aqpanynda saǵat 12:07-de Jambyl oblystyq polıtsııa departamentiniń kezekshi bólimine Qordaı aýdanynyń Masanchı aýylynda saýda ortalyǵy ǵımaratyn (órtten keıin shatyry qulaǵan) tazartý kezinde qıraǵan úıindilerdiń astynan adamnyń órtengen múrdesi tabylǵandyǵy týraly aqparat tústi. Máıittiń jeke basyn anyqtaý úshin sot-medıtsınalyq saraptama taǵaıyndaldy. Jedel aldyn-alý sharalary júrgizilýde», - dep jazdy ol.

Eske salaıyq , 7 aqpan kúni Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles boldy.

QR Prezıdenti Qasym-Jomart Toqaev buzaqylyq sıpattaǵy jappaı tóbelesti aıyptap, arandatýshylar buny odan saıyn órshitkenin málimdedi.

Qazirgi ýaqytta Qordaı aýdanyndaǵy oqıǵa baılanysty 25-ten astam qylmystyq is qozǵaldy.