Marsqa sátti qonǵan Perseverance tirshilik belgisin izdeıdi

NUR-SULTAN. QazAqparat – Beısenbi kúni keshke NASA ǵarysh agenttigi Marsqa jańa Perseverance (Perseverans) roverin qondyrdy (aǵyl. – tabandy, qaısar), dep habarlaıdy QazAqparat VVS-ge silteme jasap.

Roverdiń Qyzyl ǵalamshardaǵy basty mindeti – bakterııa tirshiliginiń belgisin izdeý. Ǵalymdardyń pikirinshe, Marsta 3-4 mıllıon jyl buryn ǵalamsharda sý bar kezde tirshilik bolýy yqtımal.

Perseverance (Perseverans) – osy aıda Marsqa kelgen úshinshi ǵarysh apparaty. Buǵan deıin planetanyń orbıtasyna BAÁ men Qytaı roboty ushyp jetti. Úsh mıssııa da Jerden 2020 jyldyń shildesinde attanǵan.

Rover Týıtterde ashylǵan paraqshasynda «Sálem, álem. Men mekenimde alǵash mynalardy kórdim», - dep jazyp, Mars betinen túsirilgen sýretti jarııalady.

Sondaı-aq ol Ezero krateriniń kadryn da jarııalady. Eki beıne de jańa apparattyń planetadan túsirip joldaǵan alǵashqy sýreti.

Marsqa qoný óte qıyn. Aıǵa qaraǵanda onda sırek atmosfera bar. Mundaǵy mıssııalardyń tek 40%-y ǵana sátti aıaqtalady.

Amerıkalyq Perseverance roverin Atlas-5 zymyran-tasyǵyshy AQSh-tyń Kanaveral múıisindegi ǵarysh aılaǵynan 2020 jyldyń 30 shildesinde alyp ushty. Jarty jyl ishinde ǵarysh kemesi Jerden Marsqa deıin shamamen 500 mıllıon shaqyrymdy ushyp ótti.