Marııa Mýdrıak Qytaıda óner kórsetedi

ASTANA. KAZINFORM - Qazaqstandyq opera ánshisi Marııa Mýdrıak Qytaıda V. Motsarttyń «Fıgaronyń úılenýi» operasyndaǵy grafınıa Almavıva partııasyn alǵash ret oryndaıdy, dep habarlaıdy QR Mádenıet jáne aqparat mınıstrliginiń baspasóz qyzmeti.

Qoıylymdar 15, 17 jáne 19 shilde kúnderi Beıjińdegi Ulttyq oryndaýshylyq óner ortalyǵynda ótedi.

Al 8–10 tamyz aralyǵynda ánshi Sıan qalasyndaǵy Grand Opera House sahnasynda óner kórsetedi.

Bul – Marııa Mýdrıaktyń Qytaıǵa besinshi gastroldik sapary. Buǵan deıin osy operada Sıýzannanyń partııasyn oryndaǵan ánshi bıyl alǵash ret grafınıa Almavıvanyń rólin somdaıdy. Bul keıipkerdiń tereń ári qarama-qaıshy sezimderi týyndyǵa erekshe dramalyq áser men emotsııalyq tereńdik beredi.

Aıta keteıik, Marııa Mýdrıak Qazaqstanda dúnıege kelgen. Ol bala kezinen-aq án aıtýǵa qyzyǵyp, 10 jasynan bastap Italııada vokaldan dáris alǵan. Sol jerde La Skala teatrynyń balalar horynda shyǵarmashylyq jolyn bastap, keıin Mılandaǵy Dj. Verdı atyndaǵy konservatorııany támamdady. Qazir ol álemniń jetekshi opera sahnalarynda óner kórsetip júr jáne álemdegi eń úzdik on sopranonyń biri sanalady.

Ánshiniń Qytaıǵa sapary — onyń halyqaralyq mansabyndaǵy taǵy bir mańyzdy qadam. Bul gastroldik saparda qytaılyq kórermen ónerpazdyń qaıtalanbas zor daýysy men akterlik sheberligin tamashalaı alady.

Aıta keteıik, Qazaqstan halqy Assambleıasynyń HHHІV sessııasynda Memleket basshysy ártúrli el men mádenıet ókilderi arasyndaǵy dostyq baılanys qaqtyǵystardyń aldyn alatynyn aıtqan edi.