Bıyl ÝEFA prezıdenti alǵash ret Ortalyq Azııaǵa kelýi múmkin
ASTANA. KAZINFORM — Qazaqstan fýtbol federatsııasynyń (QFF) prezıdenti Marat Omarov resmı saparmen Shveıtsarııanyń Non qalasyna baryp, ÝEFA basshysy Aleksander Cheferınmen jumys kezdesýin ótkizdi.
Kezdesý barysynda Marat Omarov Cheferındi Qazaqstanǵa resmı saparmen kelýge shaqyrdy. ÝEFA basshysy bul usynysty qabyl alyp, 2025 jyly Ortalyq Azııaǵa alǵash ret kelýdi josparlap otyr.
Sondaı-aq, Qazaqstanda iri eýropalyq týrnırlerdi ótkizý múmkindigi talqylandy. QFF elimizde Eýropa jastar chempıonatyn jáne Almaty men Astanada ÝEFA Konferentsııa lıgasynyń fınalyn ótkizý týraly usynystar jasady.
Kezdesý qorytyndysy boıynsha ÝEFA Qazaqstan fýtbolyn damytýǵa tolyq qoldaý kórsetetinin aıqyndady. Bul ınfraqurylymdy jaqsartý, balalar men jasóspirimder fýtbolyn damytý, ishki chempıonattardyń deńgeıin kóterý, ınvestıtsııa tartý jáne zamanaýı fýtbol tehnologııalaryn engizý máselelerin qamtıdy.
ÝEFA jáne QFF prezıdentteri Qazaqstan quramalary jaıly sóılesip, jastar komandalarynyń damýy men klýbtardyń básekege qabilettiligin arttyrý máselelerin talqylady.
Ásirese, eýropalyq úzdik standarttardy qazaq fýtbolyna engizý máselesine basa nazar aýdaryldy. Bul qadam fýtbolshylar men bapkerlerdiń sporttyq daıyndyǵyn jaqsartyp, olardyń kásibı deńgeıin kóterýge yqpal etedi.
Otandyq klýbtardyń Chempıondar lıgasy, Eýropa lıgasy, Konferentsııa lıgasy sekildi halyqaralyq týrnırlerge qatysýy — negizgi talqylanǵan taqyryptardyń biri boldy. Óıtkeni bul jarystar qazaq fýtbolshylarynyń sheberligin arttyryp, eldegi fýtbolǵa qyzyǵýshylyqty kúsheıtýge septigin tıgizedi.
Sapar barysynda Marat Omarov ÝEFA tóreshiler komıtetiniń basshysy Roberto Rozettımen de kezdesti. Kelissózder nátıjesinde QFF tóreshiler departamentiniń dırektoryn taǵaıyndaý boıynsha arnaıy keńesshiler toby jiberiletin boldy.
Sonymen qatar, ÝEFA «Hat-Trick» baǵdarlamasy aıasynda QFF-nyń jańa ınfraqurylymdyq bastamalaryna tolyq qoldaý kórsetetin boldy.
Qazaqstan fýtbol federatsııasy men UEFA Foundation arasyndaǵy áriptestik áleýmettik jáne ınklıýzıvti jobalar boıynsha jańa serpin alady. Kórý qabileti nashar balalar men erekshe qajettilikteri bar balalarǵa arnalǵan bastamalardy birlesip damytý týraly kelisim jasaldy. ÝEFA áıelder fýtbolyn damytý baǵytyndaǵy QFF jobalaryna tolyq qoldaý kórsetetin boldy.
Sapar qorytyndysy boıynsha, Qazaqstannyń aldaǵy tórt jyl ishinde halyqaralyq týrnırlerdi ótkizýge daıyndyǵy týraly jospar bekitildi.
Bul kezdesý Qazaqstan úshin asa mańyzdy. ÝEFA-men tyǵyz baılanys ornatý elimizdi eýropalyq fýtbol protsesiniń belsendi qatysýshysyna aınaldyryp, qazaq fýtbolynyń álemdik deńgeıdegi bedelin arttyrýǵa yqpal etedi.
Marat Omarovtyń Nonǵa saparynyń oń áserin jaqyn arada tek otandyq fýtbol fýnktsıonerleri emes, jankúıerler, balalar fýtbol mektepteri men fýtbol ortalyqtary da sezinetin bolady.
Osyǵan deıin Davıd Lorııa Qazaqstan fýtbol federatsııasynyń vıtse-prezıdenti qyzmetine taǵaıyndalǵanyn jazdyq.