Marat Beketaev sot saraptamasy salasyndaǵy ózgeristerdi aıtty

NUR-SULTAN. QazAqparat – Sot saraptamasy organdary medıtsınalyq qyzmetkerlerine zııandy eńbek jaǵdaıy úshin qosymsha eńbekaqysy kóterildi. Bul týraly halyqqa onlaın rejımde esep berý kezdesýinde Ádilet mınıstri Marat Beketaev aıtty, dep habarlaıdy QazAqparat tilshisi.

«Bas prokýratýra jáne Іshki ister mınıstrligimen birlesken buıryq aıasynda Nur-Sultan, Almaty, Shymkent qalalarynda, Qostanaı jáne Pavlodar oblystarynda qylmystyq ister boıynsha jekelegen saraptama túrlerin básekelestik ortaǵa berý jónindegi pılottyq joba iske qosyldy. Osylaısha, 3490 saraptama júrgizildi. Pılot oń nátıje kórsetti. Saraptama óndiristeriniń merzimi qysqartyldy jáne memlekettik sarapshylarǵa aýyrtpalyq tómendetildi», - dedi mınıstr.

Onyń aıtýynsha, bul baǵyttaǵy jumys saraptama túrleriniń sanyn ulǵaıtý jolymen jalǵasatyn bolady.

«Sot saraptama organdarynyń ınfraqurylymyn jańǵyrtý maqsatynda Nur-Sultan qalasynda sot saraptama ınstıtýtynyń úlgilik ǵımaratynyń qurylysy salynýda. Sot saraptamasy organdary medıtsınalyq qyzmetkerlerine zııandy eńbek jaǵdaıy úshin 30-dan 45 paıyzǵa deıin qosymsha eńbek aqysy kóterildi. Áleýmettik jaǵdaıdy jaqsartý maqsatynda jalaqy tóleýdiń faktorlyq-baldyq shkala júıesi engizildi», - dedi M. Beketaev.

Onyń sózine qaraǵanda, qazirgi ýaqytta Parlament Májilisiniń depýtaty bastamashylyq etken sot-saraptama qyzmeti máseleleri jónindegi zańnamaǵa túzetýler jobasy Májilistiń qaraýynda. Zań jobasyn qabyldaý sot-saraptama qyzmeti naryǵynda básekelestikti qurýǵa, jeke sot sarapshylary qyzmetiniń ashyqtyǵyn, sapany júıeli baqylaýdy qamtamasyz etýge, sondaı-aq sot saraptamasy organdarynyń qyzmetin ońtaılandyrýǵa múmkindik beredi.