Marat Áıtenovtyń burynǵy áıeline sot sheshimi shyqty

ASTANA. KAZINFORM — Astana qalasynyń ákimshilik mamandandyrylǵan aýdanaralyq soty Dana Ateshovaǵa qatysty ákimshilik materıaldy qarady.

«Іs materıaldaryna sáıkes, kelinshek otbasylyq janjal barysynda burynǵy jubaıyna bylapyt sózder aıtqan. Sotta ol kinásin moıyndamady. Ol burynǵy jubaıyn bylapyt sózdermen qorlamaǵanyn, tek bylapyt sózder túrindegi etistikti qoldanǵanyn túsindirdi. Sonymen birge burynǵy jubaıynyń úıde zańsyz bolyp, ony arandatqanyn jetkizdi», — dep habarlady QR Joǵarǵy soty.

ÁQBtK-niń 73-baby 1-bóliginiń sanktsııasy aıasynda bul qylyǵy úshin eskertý jasalady ne 5 táýlikke ákimshilik qamaqqa alynady. Al quqyq buzýshynyń jas balalary bar jáne ol qamaqqa alý qoldanylmaıtyn adamdar sanatyna jatady.

Jas balalarynyń bolýy jáne mundaı áreketti alǵash ret jasaǵany jaýapkershilik pen jazany jeńildetetin mán-jaı retinde tanyldy. Aýyrlatatyn eshteńe joq. 

Sot eskertý túrindegi ákimshilik jaza qoldanyp, kelinshekti ÁQBtK-niń 73-babynyń 1-bóligi boıynsha kináli dep tanydy.

Qaýly zańdy kúshine engen joq.

Esterińizge salsaq, elorda turǵyny Dana Ateshova burynǵy kúıeýi Marat Áıtenovtiń polıtseılermen jáne jeke sot oryndaýshylarmen birge úıine kelip, balalardy bir-birlep úıden májbúrlep shyǵarǵanyn, ózin soqqyǵa jyqqanyn áleýmettik jelide jarııalaǵan bolatyn.

Keıinirek Marat Áıtenov ÁQBtK 73-babynyń 1-bóligimen kináli dep tanylyp, 5 táýlikke qamaýǵa alyndy.

Aıta keteıik, Marat Áıtenov — Shymkenttiń burynǵy ákimi Murat Áıtenovtyń týǵan baýyry. Murat Áıtenov 2020-2023 jyldary Shymkentti basqarǵan.

Byltyr qyrkúıekte Prezıdent Jarlyǵymen qyzmetinen bosatyldy.