Maraldy aýylynyń turǵyndary altyn óndirisin ashýǵa qarsy pikirde

ÓSKEMEN. QazAqparat – Shyǵys Qazaqstan oblysy Kúrshim aýdany Maraldy aýylynyń halqy altyn óndirý fabrıkasynyń qurylysyna qarsylyq tanytty, dep habarlaıdy QazAqparat tilshisi.

Maraldy aýylynda altyn óndirý fabrıkasynyń qurylysyna qatysty qoǵamdyq tyńdaý ótti. Oǵan eldi meken turǵyndary, Shyǵys Qazaqstan oblysy ákiminiń orynbasary Erjan Nurbaev, Kúrshim aýdany ákimdiginiń ókilderi, depýtattar men ekologtar qatysty.

Fabrıka qurylysyn júrgizbek nıettegi kompanııa qyzmetkerleri jobanyń ekologııalyq talaptarǵa sáıkes keletindigin alǵa tartty. Alaıda, altyndy ashyq jolmen óndirý jáne fabrıka salý máselesi jergilikti turǵyndardy alańdatady.

Qoǵamdyq tyńdaýǵa QR Ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Zýlfýhar Joldasov ta qatysty.

«Jergilikti halyq biraýyzdan fabrıka qurylysyna qarsylyq bildirip otyr. Qazirgi ýaqytta joba ekologııalyq saraptamadan ótkizilip jatyr. Biz qoǵamdyq pikir men ekologııalyq talaptarǵa súıenip, bir aıdyń ishinde tıisti sheshim qabyldaımyz», - dedi ol.