Buǵynyń múıizi men qanynan erekshe emdik ónim alatyn sharýashylyq
ASTANA. KAZINFORM – Býrabaıdyń saýyqtyrý týrızmi jalpy jurtqa tanymal bola bastaǵan. Solardyń biri – Aqmola oblysy Býrabaı kentiniń irgesindegi teńbil buǵynyń múıizi men qanynan emdik maqsatta ónim alyp otyrǵan «AQ MARAL» sharýashylyǵy.
Búginde atalǵan Prezıdent Іs basqarmasy «Býrabaı» ulttyq parkiniń maral ósiretin sharýashylyǵynda 200-den astam bas teńbil buǵy qolda baǵylýda. Olar ózderiniń tabıǵı ortasynda – 600 gektarǵa sozylyp jatqan qalyń orman alqabyn mekendeıdi.
«Qys mezgilinde kúnine eki ret jem-shóbin beremiz. Jazdy kúni maraldar kók shalǵyndy qýalap jaılyp, qolǵa kóp kele bermeıdi. Mekendeıtin sharýashylyq aýmaǵy temir torlarmen qorshalǵan. Osy ýaqytqa deıin ıt-qustan amanbyz. Biraq sonda da qaýpsizdik úshin kúzetip, baqylap otyramyz. Teńbil buǵy 14-15 jyl ómir súredi. Onyń 3 jasynan bastap múıizin kesip, emdik maqsatta paıdalanamyz. Negizinen maýsym-tamyz aılarynda kesemiz. Naýryzdyń aıaǵynda maraldyń múıizi ózdiginen túse bastaıdy da, ornyna jańasy ósip shyǵady. Olardy ustap kórseńiz, jup-jumsaq bolady. Sol múıizder 10-15 santımetrdeı ósken kezde túbinen eki eli tuqylyn qaldyryp kesemiz. Buǵynyń jas múıizinde jan bolmaıdy. Durys ólshep, kesse aýyrsynýdy sezbeıdi», - deıdi ortalyqtyń sharýashylyq basshysy Aıbolat Rahmatýlın.
Mamandardyń aıtýynsha, Buǵynyń múıizi men qany – artrıt, artroz, osteohondroz sııaqty tirek-qımyl júıesi aýrýlaryn emdeý úshin, sonymen qatar ımmýndyq júıeni kúsheıtýge qoldanylady. Tabıǵatta 22 túrli amınqyshqyly bar bolsa, olardyń 18-i buǵy múıizinen tabylǵan. Jalpy álemde buǵynyń múıizi men qany emdik maqsatta keńinen qoldanylady. Sondyqtan «AQ MARAL» sharýashylyǵy kelgen qonaqtarǵa osyndaǵy pantamen emdeý ortalyǵyna baryp, dárigerdiń keńesin ala otyryp, erekshe ónimmen em alýyna jaǵdaı jasaǵan.
