Marafon jeńimpazy óziniń áserimen bólisti

ASTANA. QazAqparat - Astanadaǵy halyqaralyq marafonnyń 42 shaqyrymdyq eń uzaq qashyqtyǵynda erler arasynda birinshi bolyp máre syzyǵyn kesken ózbekstandyq Andreı Petrov jeńisten keıingi áserimen bólisti, dep habarlaıdy «QazAqparat»HAA tilshisi.

«Men marafon týraly estigen kúnnen-aq qyzý daıyndyqty bastadym. Ol týraly úsh aı buryn estigen edim. Bas júldege ıe bolǵanyma óte qýanyshtymyn.  Osyndaı aýqymdaǵy jarysty uıymdastyryp, bizge qoldaý bildirgen Qazaqstanǵa alǵys aıtamyn» - deıdi chempıon.

Jeńimpazǵa altyn medal men 13 myń AQSh dollary tabys etilgen bolatyn. Ázirge chempıon alǵan syıaqysyn qaıda jumsaıtynyn  bilmeıdi.

«Men osynda jeńiske jetýge, tym bolmaǵanda alǵashqy úshtikke enýdi kózdedim. Marafondarǵa qatysqanyma 7 jyl bolyp qaldy. 2013 jáne 2015 jylǵy Azııa chempıonattarynda top jardym. Ystyq kól marafonynda jeńiske jettim», - deıdi Petrov.

Sonymen birge chempıon marafonshylardyń júrip ótken tasjoldyń sapasyna joǵary baǵa berdi.

«Men jas marafonshylarǵa shydamdy ári eńbekqor bolsyn dep keńes bergim keledi. Mundaǵy eń basty qasıet -shydamdylyq. Óıtkeni 42 shaqyrymǵa ekiniń biri tóze almaýy múmkin», -deıdi ózbek azamaty.