Maqsut Narikbayev University stýdentteri Ózbekstanda tájirıbe almasady
TAShKENT. KAZINFORM – Maqsut Narikbayev University (MNU) stýdentteriniń tarıhı tanymyn keńeıtý maqsatynda uıymdastyrylǵan «Jibek joly izimen» jobasy negizinde bilim alýshylar Ózbekstanǵa ekskýrsııaǵa keldi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Osydan birineshe jyl buryn atalǵan oqý ornynyń bastamasymen qolǵa alynǵan «Jibek joly izimen» jobasy aıasynda stýdentter elimizdiń Taraz, Shymkent, Túrkistan sııaqty kóne shaharlaryna saıahat uıymdastyrǵan. Bıyl mundaı tanymdyq is-shara Ózbekstanda jalǵasyn taýyp otyr.
Atalǵan jobanyń maqsaty – tájirıbe almasý, stýdentterdiń ýnıversıtet qabyrǵasynda tarıh páni boıynsha alǵan teorııalyq bilimin kóne qalalarǵa ekskýrsııa uıymdastyrý arqyly sanasyna sińirý.
Qazaq jastarynyń Tashkenttegi sapary memlekettik zań ýnıversıtetinen bastaldy. Oqý orny ornalasqan ǵımarat ótken ǵasyrlardyń kýási ispetti. Bir kezderi bul nysan erler gımnazııasy bolǵan, onda Mustafa Shoqaı tálim alǵan.
«Keıingi 10 jyl ishinde stýdentterimizdi Qazaqstannyń kóptegen tarıhı jerlerine alyp bardyq. Máselen, batysta Beket ata kesenesi, Bozjyra, Sherqala, shyǵysta - petroglıfter men Berel qorǵany. Ońtústikte de kóne tarıhı mekender bar. Munyń bári stýdentterdiń qalypty dárisine ózgeshelik engizedi. Tek teorııaǵa senim artpaı, tanymdyq baǵytta bilim bergendi jón sanadyq. Endi mine ejelgi Jibek jolynyń izimen Ózbekstannyń qalalaryna da kelip otyrmyz. Jalpy, bul saparymyzǵa Ózbekstannyń Qazaqstandaǵy Elshiligi uıytqy boldy», - dedi MNU professory Lepýda Muqataeva.
Endi jastar Tashkent pen Samarqandaǵy tarıhı oryndarǵa saıahatqa attanady. Qazaqstandyq stýdentter aldaǵy kúnderi qazaq pen ózbektiń arǵy-bergi tarıhynan syr shertetin kóne nysandardy aralap, babalar murasymen tanysady.
«Osy ekskýrsııaǵa qatysý úshin júzdegen adam saıt arqyly arnaıy anyqtama toltyryp, ótinish bildirdi. Sonyń ishinen 35 adam iriktelip, Ózbekstanǵa keldi. Osy stýdentterdiń qatarynda tarıhı oryndarǵa jasalatyn saıahatqa qatysyp jatqanyma qýanyshtymyn. Ekskýrsııa barysynda kóptegen derektermen tanysyp, tarıhı mekenderdi kózben kórip jatyrmyz», - dedi MNU stýdenti Ámına Qadyrbaeva.
Toqtala keteıik, Maqsut Narikbayev University men Tashkent memlekettik zań ýnıversıtetiniń arasynda kelisim bar, oǵan saı, qos dıplom baǵdarlamasy júzege asyp jatyr. Osyndaı baǵyt boıynsha bilim alǵan túlekterdiń alǵashqy legi bıyl dıplom almaq.
