116 myńnan astam oqýshy kásibı baǵdarlaý testileýinen ótti
ASTANA. KAZINFORM – 2025 jyly Mansap Kompasy platformasynda júıeli kásibı baǵdar berý jumysyna baǵyttalǵan kásibı ózin-ózi aıqyndaýdyń tsıfrlyq quraly engizildi. Jyl qorytyndysy boıynsha platformada 7–11-synyptardaǵy 116,5 myń oqýshy testileýden ótti.
Eńbek jáne halyqty áleýmettik qorǵaý mınıstrligi málimetinshe, paıdalanýshynyń belgili bir mamandyqqa beıimdiligin anyqtaýǵa múmkindik beretin bul tsıfrlyq qural Jumysshy mamandyqtar jyly aıasynda is-sharalar josparyn iske asyrý sheńberinde ázirlendi.
Test tulǵanyń qyzyǵýshylyqtary men beıimdiligin baǵalaýdyń halyqaralyq ádistemelerin qoldana otyryp jasalǵan. Testileýden ótkennen keıin júıe nátıjelerdi avtomatty túrde taldap, paıdalanýshyǵa mamandyqtar boıynsha jeke usynymdar qalyptastyryp usynady. Sondaı-aq tıisti mamandyqtar men daǵdylardy meńgerý múmkindikteri týraly aqparat beredi.
Joba memlekettik organdar men salalyq mamandardyń vedomstvoaralyq ózara is-qımyly negizinde, QR Eńbek jáne halyqty áleýmettik qorǵaý mınıstrliginiń, Oqý-aǵartý mınıstrliginiń jáne «Eńbek resýrstaryn damytý ortalyǵy» AQ-nyń qatysýymen iske asyrylyp jatyr.
– Mansap Kompasy bilim alýshylarǵa kásibı dıagnostıka men mansapty josparlaý quraldaryn usynyp, aldaǵy bilim berý jáne kásibı traektorııany sanaly túrde tańdaýǵa kómektesedi, – dep atap ótti «Eńbek resýrstaryn damytý ortalyǵy» AQ basqarýshy dırektory Ernat Júnisov.
Aldaǵy ýaqytta jyl saıyn keminde 100 myń mektep oqýshysy testileýden ótip, usynymdar alady dep josparlanǵan. Osy maqsatta óńirlik úılestirýshiler men kásibı baǵdar berýshi pedagogtar oqytylyp, paıdalanýshylardy súıemeldeý uıymdastyryldy. Sondaı-aq óńirler men bilim berý uıymdary bólinisinde nátıjelerdi monıtorıngteý jáne taldaý júıesi engizildi.
2026 jyly oqýshylardy qamtý aıasyn keńeıtý jáne quraldy bilim berý uıymdarynda qoldanýdy keńeıtý josparlanyp otyr.
Buǵan deıin alǵash ret kásibı baǵdar berýge arnalǵan biryńǵaı ádistemelik nusqaýlyq ázirlengenin jazǵan edik.