Mańǵystaýdyń bir aýylynda 30 egiz turady
Olardyń úlkeni 40-tan assa, eń kishisi - 4 aılyq sábıler. Aıadaı ǵana aýylda jyl saıyn keminde bir otbasyda egizder ómirge kelgen.
«Jańa aýyl» kóshesi halyq arasynda «Egizder kóshesi» dep atalyp ketken. Óıtkeni, mundaǵy 7 úıde egizder turady. Al myna shańyraqta eki ret egiz bala dúnıege kelgen.
Gúlzıra men Gúlmırany ómirge ákelgen Nazarovtar otbasynyń shańyraǵy. Úıdiń tuńǵyshtary 1997 jyly dúnıege kelse, araǵa 4 jyl salyp erli-zaıyptylar egiz uldy bolypty. Mundaı sırek kezdesetin jaıtty úı ıesi Aıdos Nazarov «táńirdiń syıy» dep sanaıdy.
«Urpaqtarymyzdyń solaı jalǵasqanyna Allaǵa shúkirshilik. Adam endi aıtýy, bylaı jetkizý qıyndaý. Keýdeńde qýanysh kernep turady ǵoı», - dedi Aıdos Nazarov.
Mamannyń aıtýynsha, bul qubylys áli tolyq zerttelmegen. Biraq, genetıkalyq turǵyda birneshe faktor áser etýi múmkin.
«Jasy úlkeıgen januıalarda bolýy múmkin. Erli-zaıyptylarda. Jáne arǵy tuqymynda aıtyp ketkendeı, áıel jaǵynan egiz bolǵan jaǵdaıda egiz týylý múmkindigi kóbirek. Er adam tasylmaldaýshy bolyp, keıin qyzdary egiz bosanýy múmkin. Ekologııalyq faktorlar bolýy múmkin. Radıatsııa, hımııa bolǵan jerlerde kóptep kezdesedi dep jatady. Tamaqtanýǵa baılanysty dep aıtyp jatady. Kóbinesie belok taǵamdaryn kóp jeıtin adamdarda», - deıdi genetık Nurgúl Júsipova.
Aıta ketsek, álemde Ushtaǵan syndy erekshe eldi-mekender neken-saıaq. Máselen, egizder eń kóp dúnıege keletin jer – Brazılııanyń Kandıdý-Godoı aımaǵy eken. Qalashyq turǵyndarynyń 10 protsenti – egizder kórinedi. Al, Ýkraınadaǵy 4 myń turǵyny bar Kopanıa aýylynda 61 egiz turady eken.