Mańǵystaýdyń aýyldarynda juma namazyna jınalýǵa ruqsat berildi

AQTAÝ. QazAqparat - Mańǵystaý oblysynyń aýyldyq jerlerinde juma namazyn ótkizýge ruqsat etilgen, dep habarlaıdy QazAqparat tilshisi.

Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblysy din isteri basqarmasynyń basshysy Maqsatbek Mahanbetov málim etti.

Onyń aıtýynsha, jýyrda Qazaqstan musylmandary dinı basqarmasynyń tóraǵasy Naýryzbaı qajy Taǵanuly koronavırýs ınfektsııasynyń taralýy boıynsha qaýipsiz «jasyl aımaqta» ornalasqan óńirlerdegi meshitte juma namazyn oqýǵa ruqsat berý týraly usynys aıtqan.

Osyǵan oraı, QR Densaýlyq saqtaý mınıstrligi tarapynan karantın talaptaryn kezeń-kezeńimen jeńildetý maqsatynda «jasyl aımaqta» ornalasqan oblystarda juma namazyn tek aýyldyq jerlerde, syıymdylyǵy 150 adamǵa deıingi meshitterde 25%-dan aspaıtyn mólsherde sanıtarlyq talaptardy saqtaı otyryp ótkizýge ruqsat etilgen.

Al qalalyq jerlerde juma namazyn oqýǵa ruqsat berilmegen.

Spıkerdiń aıtýynsha, bul qala turǵyndarynyń kóptigine baılanysty.

«Osy jerde túsindire keteıik. Qala turǵyndary ózderiniń «juma namaz» qulshylyǵyn oryndaý úshin qala mańyndaǵy aýyldyq meshitterge barý derekteri oryn alyp jatyr. Al aýyldyq meshitterdiń syıymdylyǵy 50-100 oryn. Eger qaladan jamaǵat aýyl meshitterine keletin bolsa sanıtarlyq dáriger qaýlysyndaǵy talaptar saqtalmaıdy. Sondyqtan qala turǵyndaryn sabyrlyqqa shaqyra otyryp, jumadaǵy qulshylyqtaryńyzdy jeke namaz retinde qalalyq meshitte nemese úılerińizde ótkizýlerińizdi suraımyn», - dedi Maqsatbek Mahanbetov.

MEShІTTE NAMAZ OQÝǴA QOIYLATYN TALAPTAR:

• Meshitke qulshylyqq etýge kelgen azamat uzaq ýaqyt meshitte bolmaýy tıis. Meshitte bolý ýaqyt uzaqtyǵy – 15 mınýt;

• Namaz oqýshylardyń araqashyqtyǵy 1,5 metr bolýy kerek jáne arnaıy belgilengen oryndarda namaz oqyp, namaz oqyp bolǵanan soń meshitten birden shyǵyp ketý;

• Meshitke keletin adam sanyn dinı ǵımarttyń jalpy paıdaly aýdanynyń 30 paıyzynan artyq toltyrmaý;

• Meshitte qol alyspaý kerek;

• Meshitterde aýa almasý júıesi jaqsy júrý úshin barlyq esikterdi ashyp qoıý qajet;

• Ár 3 saǵat saıyn namaz oqıtyn zaldardy zalalsyzdandyrý jumystaryn júrgizý qajet;

• Namaz oqıtyn zaldarda ımamdar jáne namaz oqıtyn adamdar mindetti túrde betperde jáne medıtsınalyq qolǵappen bolý kerek;

• Jasy úlken kisiler, densaýlyǵy nashar adamdar (er jáne áıel) jáne jas balalar namazdaryn úılerinde oqyǵany abzal;

• Meshit dárethanalaryn qoldaný barysynda araqashyqtyqty jáne santıtarlyq talaptardy saqtaýy tıis;

• Meshittiń kireberisinde turǵan antıseptıkalyq quraldardy paıdalaný qajet;

• Meshitke kirý bólek esikten jáne shyǵý bólek esikter arqyly bolýy tıis.