Mańǵystaýda sý tushytý zaýytynyń qurylysy bastaldy

AQTAÝ. QazAqparat - Mańǵystaýda qýaty táýligine 50 myń tekshe metr bolatyn jańa sý tushytý zaýytynyń qurylysy bastaldy, dep habarlaıdy QazAqparat tilshisi.

Qaraqııa aýdanyna qarasty Toqmaq jerinde teńiz sýyn tushytý zaýytyn salý Jańaózen qalasy halqynyń aýyz sýǵa degen qajettiligin tolyq qamtamasyz etýge múmkindik beredi.

Jańaózen qalasy Edil sýyn Qıǵash ózeni arqyly «Astrahan-Mańǵyshlaq» qubyrynan alyp, tutynady. Bul - Atyraý jáne Mańǵystaý oblystaryndaǵy birqatar eldi mekenderdiń halqy úshin sýdyń jalǵyz ortalyqtandyrylǵan kózi. Sý tutyný kólemi halyq sanynyń ósýine jáne jańa kásiporyndardyń paıda bolýyna baılanysty jyldan jylǵa artyp otyr.

«Toqmaq aımaǵynda sý tushytý qondyrǵysyn salý jobasy iske asyryla bastady. «QazMunaıGaz» kompanııasynyń enshiles mekemesi – «Ózenmunaıgaz» ázirlegen bul jobany iske asyrý «Astrahan-Mańǵyshlaq» sý qubyrynan sý tarta otyryp, Jańaózen qalasy men basqa da eldi mekenderdiń turǵyndaryn sýmen qamtamasyz etýge múmkindik beredi. Sonymen qatar, bul týrızmdi, kásipkerlikti jáne aýyl sharýashylyǵyn damytýǵa mýltıplıkatıvti áser etedi. Sondaı-aq halyqqa jańa jumys oryndarynyń ashylýyna yqpal bolady, - dep atap ótti Mańǵystaý oblysynyń ákimi Nurlan Noǵaev.

Sý tushytý zaýytynyń qurylysy óńir úshin júzdegen jańa jumys ornyn qalyptastyrady. Qurylys kezeńinde 240-tan astam adam, al zaýyt jumysyn bastaǵan soń 100-den astam turǵyn jumyspen qamtamasyz etiledi. Qurylys jumystaryn 2024 jyldyń sońyna deıin aıaqtap, 2025 jyldyń kókteminde zaýytty jobalyq qýatqa shyǵarý josparlanǵan.