Mańǵystaýda «Sergek» júıesi iske qosyldy

AQTAÝ. QazAqparat – Jol qaýipsizdigin qamtamasyz etý maqsatynda Aqtaý qalasy men Munaıly aýdanyna ornatylǵan «Sergek» zııatkerlik beınebaqylaý júıesi búginnen bastap iske qosyldy, dep habarlaıdy QazAqparat tilshisi.

Aqtaý joldaryndaǵy qaýipsizdikti 638 kamera, al Munaıly aýdanyndaǵy jol qozǵalysyn 500 kamera baqylaıdy. Beınebaqylaý júıesindegi jazbalar 30 kún boıy saqtalady.

«Mańǵystaý oblysynda 5 aı ishinde 164 jol-kólik oqıǵasy tirkelip, odan 32 adam qaza tapqan, 185 adam ártúrli dene jaraqatyn aldy. 5 aı ishinde 80 jol-kólik oqıǵasy tek jaıaý júrginshilerde bolǵan. Sol sebepten atalǵan «Sergek» júıesi Qazaqstannyń basqa óńirlerinde bar jáne atalǵan júıe sol qalalarda oń áserin bergen. Bizdiń kólik júrgizýshileriniń de joldaǵy mádenıetin arttyrady degen oıdamyn», – dedi Mańǵystaý oblystyq Polıtsııa departamenti ákimshilik polıtsııa basqarmasy bastyǵynyń orynbasary Súıin Qurmantaev.