Mańǵystaýda óńdeý sektoryndaǵy eksportqa qoldaý kórsetiledi

AQTAÝ. QazAqparat - Mańǵystaýda sarapshylardyń pikirinshe, toqyma óndirisin damytýǵa, munaı kompanııalary úshin sorǵylar men kompressorlar óndirýge jáne taýardy Kaspıı mańy elderine eksporttaýǵa múmkindik zor, dep xabarlaıdy QazAqparat tilshisi.

Buǵan negiz bolatyn birden-bir faktor - oblystyń kólik-logıstıkalyq áleýeti. Aımaq basshysy Eraly Toǵjanov óńir aktıvimen ótken jıynda osylaı dedi.

Oblys ákimi Elbasy Joldaýyndaǵy tórtinshi basymdyq - óńdeý sektoryndaǵy eksporttaýshylarǵa qoldaý kórsetý jaıyn aıtyp ótti.

«Úkimet tarapynan ekonomıkanyń óńdeý salasyn damytýǵa teńdessiz kómek kórsetiledi. Ol úshin aldaǵy úsh jylda 500 mıllıard teńge bólinedi. Taǵy da 600 mlrd teńge ekinshi deńgeıdegi bankter arqyly kásipkerlerge uzaq merzimge nesıe retinde beriledi. Osy sharalar óńdeý sektorynda eksportqa baǵdarlanǵan óndirister ashatyn kásipkerler úshin qabyldanǵan»,- dedi Eraly Toǵjanov. 

Ázirge óńirdegi óńdeý salasynyń jalpy ónerkásip kólemindegi úlesi tómen kórsetkishti kórsetip otyr (2017 jyly - 3,4%). Sondyqtan, osy salany damytýǵa basymdyq berilmek. Bul baǵytty damytýǵa oblysymyzda múmkindikter men rezervter jetkilikti.

Eń úlken rezerv - munaı óndirýshi kompanııalarda.

«Mysaly, 2017 jyly óńirdiń munaı-gaz óndiretin kompanııalary taýarlar men qyzmetterdiń 30%-yn syrttan satyp aldy»,-dedi óńir basshysy.

Sondyqtan jıynda Eraly Toǵjanov qarajattyń syrtqa ketpeı, elde qalýyn basa aıtty. Ol úshin ındýstrııalyq-ınnovatsııalyq damý basqarmasyna tıisti sharalardy júrgizýdi tapsyrdy.

Budan bólek, Joldaýda aıtylǵan ınnovatsııany damytý boıynsha oblysta birqatar jobalar iske asqan. Atap aıtsaq, Batyr aýylynda qýaty 2 Mvt kún elektr stantsııasy paıdalanýǵa berildi. Mańǵystaý jáne Túpqaraǵan aýdandarynda jel jáne kún elektr stantsııalarynyń qurylysy júrip jatyr. Sondaı-aq, jańa texnologııalardy engizýden munaı kompanııalary da tys qalmaı, biraz jumystardy qolǵa alǵan.

«Máselen, Shlıýmberje kompanııasy «Qaýipsizdik tehnıkasyn oqytý  barysynda vırtýaldy tehnologııany qoldaný» jobasyn iske asyrdy. «Mańǵystaýmunaıgaz» jáne «Ózenmunaıgaz» kompanııalary «Intellektýaldy ken orny» jobasyn engizýde. «Qarajanbasmunaı» kompanııasy óndiristik symsyz baılanys jelisine kóshedi»,-dedi Eraly Toǵjanov.

Sondyqtan, aımaq basshysy tyń jobalar sanyn arttyrýdy mindet etip qoıdy. Ásirese, óńirdegi jalǵyz joǵary oqý ornynyń ujymyna ınnovatsııany damytý baǵytynda belsendi bolýdy tapsyrdy. Sońǵy ýaqytta robototexnıka jasap, álemdi baǵyndyryp júrgen oqýshylar tárbıelegen Nazarbaev zııatkerlik mektebiniń ustazdaryna bilim basqarmasymen jáne «Bilim-Innovatsııa lıtseıimen» birigip, serpindi jobalardy anyqtaý tapsyryldy. Olardy iske asyrýǵa ınvestorlar tartylady.